Bajche’ mi lac lʌc’tesan lac bʌ ti Dios ti oración

1. Jini oración jiñʌch i pejcʌntel Dios yic’ot lac pec’lel. Yom mi lac pejcan Dios ti oración ti pejtelel ora. Mi muc’ʌch lac mel, mi caj lac ñumen lʌc’tesan lac bʌ ba’an che’ bajche’ juntiquil la camigo wen c’uxbibil bʌ. Anquese Jehová wen ñuc yic’ot wen p’ʌtʌl, mi’ ñich’tan la coración. ¿Mu’ ba a pejcan Dios ti pejtelel ora? (Salmo 65:2; 1 Tesalonicenses 5:17.)

2. Jini oración jiñʌch lac ch’ujutesaya ja’el. Jini cha’an, cojach Jehová Dios yom mi lac melben oración. Che’ bʌ tsajñi Jesús ila ti Pañimil, tsi’ chʌn pejca i Tat ti oración, i ma’anic majch yambʌ. Joñonla che’ yom mi lac mel ja’el (Mateo 4:10; 6:9). Pero yom mi lac chʌn mel oración ti’ c’aba’ Jesús. Che’ bajche’ jini, mi lac pʌs cha’an wolʌch lac ch’ʌm ti ñuc i yajñib Jesús, yic’ot cha’an muc’ʌch lac ñop tsi’ yʌc’ʌ i bʌ cha’an tsi’ mʌñʌyonla (Juan 14:6; 1 Juan 2:1, 2).

3. Che’ mi lac pejcan Dios ti oración, yomʌch mi lac pejcan yic’ot lac pusic’al. Mach yomic mi lac chʌn al jini tsa’ix bʌ la cʌlʌ, mi muq’uic i mejlel lac pejcan ti jump’ejl jun (Mateo 6:7, 8). Mi’ mejlel lac mel oración bajche’ic jach añonla pero yom mi lac ch’ʌm ti ñuc, yic’ot bajche’ jach ora yic’ot baqui jach. Dios mi’ ñich’tan ja’el jini oración mu’ bʌ lac mel ti lac pusic’al, anquese ma’anic mi lac cha’len t’an (1 Samuel 1:12, 13). Wen ja’el che’ mi lac bajñel mel la coración ba’ ñʌch’ʌl pañimil, yic’ot ba’ ma’anic mach an (Marcos 1:35).

4. ¿Chuqui tac mi mejlel a c’ajtin ti a woración? Jin jach mu’ bʌ mejlel i coltañonla cha’an chʌn i yamigojonla Dios (Filipenses 4:6, 7). Jini oración lac pʌsbentel bʌ, mi’ pʌs cha’an yomʌch mi lac mel oración ti’ c’aba’ yic’ot chuqui mi caj i mel Jehová. Yic’ot ja’el mi’ mejlel laj c’ajtin chuqui anto yom lac cha’an, yic’ot cha’an mi’ ñusan lac mul i cha’an mi’ coltañonla lac lʌt’ i yilʌbentel lac pusic’al (Mateo 6:9-13). Ti la coración mach yomic lac bajñel c’ajtin chuqui jach bajñel la com. Cojach yom mi laj c’ajtin che’ bajche’ yom Dios (1 Juan 5:14).

5. Jatet mi mejlel a mel oración ti pejtelel ora, che’ mi’ ñijcañet a pusic’al cha’an ma’ suben Dios wocolix i yʌlʌ o ma’ ch’ujutesan (1 Crónicas 29:10-13). Mach a cʌy a mel oración che’ an a wocol yic’ot che’ bʌbʌq’uen ma’ sʌt i xuc’tʌlel a pusic’al (Salmo 55:22; 120:1). Yic’ot ja’el uts’at che’ mi lac mel oración che’ mi caj laj c’ux lac waj (Mateo 14:19). Jehová mi’ subeñonla cha’an mi lac chʌn mel oración ti «pejtelel ora» (Efesios 6:18).

6. Che’ mi lac mel jump’ejl mulil wen tsʌts bʌ, mach yomic mi laj cʌy laj c’ajtiben Jehová ti oración cha’an mi’ ñusʌbeñonla yic’ot cha’an mi’ pʌsbeñonla i p’untaya. Dios «chajpʌbilix cha’an mi’ ñusʌbeñonla» pero mi muc’ʌch lac tsictesan jini lac mul yic’ot mi lac cha’len wersa cha’an ma’anix mi lac chʌn mel (Salmo 86:5; Proverbios 28:13).

7. Jehová cojach mi’ yubiben i yoración jini tojo’ bʌ. Cha’an mi’ ñich’tan Dios a woración, jatet yom ma’ cha’len wersa cha’an ma’ wajñel che’ bajche’ an Ti’ mandar (Proverbios 15:29; 28:9). Che’ ma’ mel oración, yom ma’ mel yic’ot a pec’lel (Lucas 18:9-14). Yomʌch ma’ mel chuqui ma’ c’ajtin ti oración. Che’ bajche’ jini ma’ pʌs cha’an wolʌch a ñop yic’ot cha’an jini a woración isujmʌch. Cojach bajche’ jini Jehová mi caj i jac’beñet a woración tac (Hebreos 11:6).

Copyright © 2009 Watch Tower Bible and Tract Society of Pennsylvania. All rights reserved.