¿Chuqui jini i Yumʌntel Dios?

1. Che’ bʌ tsajñi Jesús ila ti Pañimil, tsi’ cʌntesayob jini xcʌnt’an i cha’an, cha’an mi’ c’ajtiñob mi’ tilel jini i Yumʌntel Dios. Jini t’an «yumʌntel» jiñʌch juntiquil yumʌl chucul bʌ ti juntiquil rey. Jini i Yumʌntel Dios juntiquilʌch yumʌl cojach bʌ. Ya’ʌch an ti panchan, i mi’ cajel ti yumʌntel ti tojlel jini año’ bʌ ila ti Pañimil. Mi cajel i sʌq’uesʌben i c’aba’ Dios o mi caj i mel ti ch’ujul. Mi caj i mejlel chuqui yom Dios ila ti Pañimil che’ bajche’ mi’ mejlel ti panchan (Mateo 6:9, 10).

2. Dios tsi’ wʌn alʌ cha’an Jesús mi caj i yochel ti Rey cha’an I Yumʌntel (Lucas 1:30-33). Che’ bʌ tsajñi Jesús ila ti Pañimil, tsi’ pʌsʌ cha’an mi caj i mel i ye’tel bajche’ juntiquil Yumʌl uts bʌ, toj bʌ yic’ot mach xmulilic. Che’ bʌ tsa’ cha’ sujti majlel ti panchan, mach ti orajic tsa’ otsʌnti bajche’ Rey cha’an jini i Yumʌntel Dios (Hebreos 10:12, 13). Che’ ti 1914, Jehová tsi’ yʌq’ue Jesús i ye’tel che’ bajche’ tsi’ wʌn sube. Che’ jini, Jesús tsi’ teche i yumʌntel ya’ ti panchan, che’ bajche’ Rey wa’chocobil bʌ i cha’an Jehová (Daniel 7:13, 14).

3. Jehová tsi’ yajca ja’el lamital winicob x’ixicob xuc’ulo’ bʌ ila ti Pañimil cha’an mi’ majlelob ti panchan. Ili winicob x’ixicob mi’ cajelob ti yumʌntel ti’ t’ejl Jesús bajche’ reyob, xmeloñelob i xmotomajob ti’ tojlel winicob x’ixicob (Lucas 22:28-30; Apocalipsis 5:9, 10). Jesús tsi’ yʌlʌ cha’an ti pejtelelob jini mu’ bʌ i cajelob ti Yumʌntel yic’ot «mach oñobic». Cojach 144.000 (Lucas 12:32; Apocalipsis 14:1-3).

4. Che’ bʌ Jesús tsa’ seb ochi ti ye’tel bajche’ Rey, tsi’ choco jubel jini Satanás yic’ot jini jontol bʌ i yángelob ila ti Pañimil. Jini cha’an tsa’ix wen asiyi jini Pañimil c’ʌlʌl che’ ti 1914 (Apocalipsis 12:9, 12). Guerra tac, wi’ñal tac, c’amʌjel tac, tsa’ p’ojli jontolil. . . , pejtelel jini jiñʌch jump’ejl «señal» yom bʌ yʌl cha’an Jesús wolix ti yumʌntel, yic’ot cha’an añoñixla ti cojix tac bʌ q’uin (Mateo 24:3, 7, 8, 12; Lucas 21:10, 11; 2 Timoteo 3:1-5).

5. Jesús lʌc’ʌlix mi’ caj ti meloñel yic’ot jini winicob x’ixicob, cha’an mi caj i t’ox bajche’ juntiquil xcʌnta tiñʌme’ mi’ t’ox i tiñʌme’ yic’ot chivo. Mi caj i q’uel bajche’ «tiñʌme’» jini tsa’ bʌ i pʌsʌyob i xuc’tilel, yic’ot mi caj i yʌq’uen i cuxtʌlel mach bʌ anic mi’ jilel ila ti Pañimil. Jini «chivojob» jiñobʌch tsa’ bʌ i ts’a’leyob i Yumʌntel Dios (Mateo 25:31-34, 46). Ti tal to bʌ q’uin, Jesús mi caj i laj jisan jini winicob x’ixicob che’o bʌ bajche’ chivo (2 Tesalonicenses 1:6-9). Mi jatet a wom cha’an i «tiñʌme’et» Jesús, yom cha’an ma’ chʌn ñich’tan jini wen t’an cha’an bʌ i Yumʌntel Dios, yic’ot ma’ mel che’ bajche’ woli a ñop majlel (Mateo 24:14).

Che’ woli ti yumʌntel jini Jesús ma’anix mach mi’ chʌn cajel ti ts’a’leya mi tic’laya

6. Ili Pañimil t’oxol ti cabʌl tejclum tac, ti jujumpejt an i bajñel yumʌlob. Jini tejclum tac mi’ contrajiñob i bʌ. Pero jini i Yumʌntel Dios mi caj i laj t’uchtan jini yumʌlob año’ bʌ ti pañimil. Cojach yumʌl mi’ caj ti ajñel ti’ petol Pañimil (Daniel 2:44). Che’ jini ma’anix mi’ chʌn cajel guerra tac, mi stsʌnsa mi jontolil. Pejtelel jini winicob x’ixicob mi caj i tem ajñelob ti ñʌch’ʌl (Miqueas 4:3, 4).

7. Che’ woli ti Yumʌntel jini Jesús Mil jabil, jini winicob x’ixicob xuc’ulo’ bʌ ma’anix i mul mi’ cajelob ti cʌlel, ti’ petol jini Pañimil mi’ cajel ti sujtel ti jump’ejl paraíso. Che’ bʌ wolix i yujtel jini mil jabil, Jesús tsa’ix i lu’ mele pejtelel jini tsa’ bʌ i yʌq’ue i mel i tat. Che’ jini i Yumʌntel mi caj i yʌq’uen i Tat (1 Corintios 15:24). ¿Chucoch mach ma’ suben a wamigojob yic’ot a cʌñʌyo’ bʌ chuqui mi caj i mel jini i Yumʌntel Dios?

Copyright © 2009 Watch Tower Bible and Tract Society of Pennsylvania. All rights reserved.