¿Majqui jini Jesucristo?

1. Che’ jalto tal ila ti Pañimil, Jesús chumul ti panchan che’ʌch bajche’ juntiquil espíritu. Jiñʌch «ñaxan» bʌ i melbal Dios; jin cha’an mi’ pejcʌntel ti «ñaxan bʌ i Yalobil» Dios (Colosenses 1:15). Jesús jiñʌch cojach bʌ Yalobil Dios ti’ bajñelil bʌ tsi’ mele. Jehová tsi’ c’ʌñʌ Jesús che’ bajche’ «juntiquil xcoltaya» che’ bʌ maxto tilem ti pañimil, cha’an mi’ mel pejtelel chuqui an ti panchan yic’ot ti Pañimil (Proverbios 8:22-31; Hebreos 1:2). Dios tsi’ c’ʌñʌ ja’el che’ bajche’ i yaj ñusaya t’an ñumen wen bʌ. Ya’ ba’ ora tsa’ subenti Jesús «jini T’an» (Juan 1:14; Apocalipsis 19:13).

2. Dios tsi’ choco tilel i Yalobil ila ti Pañimil, che’ bʌ tsi’ c’axtesʌbe i cuxtʌlel ti’ matriz María. Jini cha’an Jesús mach juntiquilic winic i tat; jin cha’an ma’anic tsi’ yila pañimil yic’ot mulil. Dios tsi’ choco tilel Jesús ila ti Pañimil uxchajp i c’ʌjñibal: 1) cha’an mi’ cʌntesañonla ti’ sujmlel Dios (Juan 18:37), 2) cha’an mi’ pʌs i xuc’tʌlel toj bʌ ti’ pejtelel, che’ bajche’ jini tsi’ yʌq’ueyonla wen bʌ i melbal cha’an mi lac lajin (1 Pedro 2:21) i 3) cha’an mi yʌc’ i cuxtʌlel bajche’ majtañʌl cha’an mi’ coltañonla loq’uel ti mulil yic’ot ti chʌmel. ¿Chucoch wersa mi yʌc’ i cuxtʌlel bajche’ majtañʌl? (Mateo 20:28.)

3. Che’ bʌ tsi’ ñusʌbe i mandar Dios, jini ñaxan bʌ winic, Adán, tsa’ yajli ti «mulil» che’ bajche’ mi yʌl jini Biblia. Jini cha’an Dios tsi’ sube cha’an mi caj i chʌmel (Génesis 3:17-19). Come ma’anix tsi’ chʌn jac’be i mandar Dios, tsa’ sujti ti xmulil. C’unte’ c’unte’ tsa’ ñox’a majlel ti wi’il tsa’ chʌmi. Adán tsi’ c’axtesʌbe mulil pejtelel i yalobilob. Jini cha’an joñonla ja’el mi lac ñox’an, mi laj c’am’an yic’ot mi lac chʌmel. ¿Bajche’ mi’ mejlel ti colelob jini winicob x’ixicob? (Romanos 3:23; 5:12.)

4. Jesús jiñʌch juntiquil winic mach bʌ anic i mul lajal bajche’ Adán. Pero q’uexel tsa’ q’uejli bajche’ Adán, come ts’ʌcʌl tsi’ jac’be i t’an Dios, yic’ot che’ ba’ ora tsi’ ñusa tsʌts tac bʌ yilʌbentel i pusic’al. Jini cha’an tsa’ mejli yʌc’ i cuxtʌlel mach bʌ yic’otic mulil, cha’an mi’ tojben i mul Adán. Jini Biblia mi’ suben che’ bajche’ jini tsa’ ujti «toj mulil». Che’ bajche’ jini, i yalobilob Adán tsa’ mʌjñiyob loq’uel ti’ p’ʌtʌlel chʌmel. Pejtelel jini mu’ bʌ i ñopob Jesús mi mejlel i tajob i ñusʌntel i mul yic’ot i cuxtʌlel mach bʌ anic mi’ jilel (1 Timoteo 2: 5, 6; Juan 3:16; Romanos 5:18, 19).

Che’ bajche’ yambʌ ye’tel, Jesús tsi’ cha’le cʌntesa tsi’ mele milagro tac yic’ot tsa’ to yʌc’ʌ i cuxtʌlel cha’añonla

5. Che’ bʌ tsajñi Jesús ila ti Pañimil, tsi’ lajmesa xc’amʌjelob, tsi’ we’ sa winicob x’ixicob año’ bʌ i wi’ñal yic’ot tsi’ ñʌch’choco ic’ ja’al. Yic’ot tsa’ to i teche ch’ojyel chʌmeño’ bʌ. ¿Chucoch tsi’ mele milagro tac? 1) Come tsi’ p’unta jini winicob x’ixicob woli bʌ i ñusañob wocol i yomʌch i coltañob. 2) Jini milagro tac tsa’ bʌ i mele tsi’ yʌc’ʌ ti cʌjñel cha’an jiñʌch i Yalobil Dios. 3) Tsi’ wʌn pʌsʌ chuqui mi caj i mel ti’ tojlel jini año’ bʌ ti pañimil xjac’t’año’ bʌ, che’ ba’ ora mi’ cha’len yumʌntel bajche’ Rey ila ti Pañimil (Mateo 14:14; Marcos 2:10-12; Juan 5:28, 29).

6. Jesús tsa’ chʌmi, Dios tsi’ cha’ teche ch’ojyel che’ix bajche’ juntiquil espíritu, i tsa’ cha’ sujti majlel ti panchan (1 Pedro 3:18). Che’ jini Dios tsi’ wa’choco ti Rey. Jesús lʌc’ʌlix mi caj i jisan ti pejtelel jini jontolil yic’ot jini wocol am bʌ ila ti Pañimil (Salmo 37:9-11; Proverbios 2:21, 22).

Copyright © 2009 Watch Tower Bible and Tract Society of Pennsylvania. All rights reserved.