Ino mô ny Fanjakan-Jagnahary?

1. Nampianarin’i Jesosy hivavaka mbôra hitongavany Fanjakan-Jagnahary ny mpianagny, tamin’izy taketo ambôny tany. Fitondragna indôsin’ampanjaka ny fanjakagna. Fitondragna miavaka ny Fanjakan-Jagnahary. An-dagnitra agny ny misy ananjy io, sady hitôndra i tany itô izio. Agnisany raha anoiny koà ny hagnamasigna agnaran-Jagnahary sady hagnanovagna ny sitrapôny aketo ambôny tany, karaha ny efa anoigna an-dagnitra agny.—Matio 6:9, 10.

2. Ho Ampanjakan’io Fanjakagna io i Jesosy araky ny nampagnantignen-Jagnahary. (Lioka 1:30-33) Efa hita ho Mpitôndra tsara fagnahy avakeo tia ny rariny sady tsisy tsigny i Jesosy, tamin’izy taketo ambôny tany. Mbôla tsy tônga de nitindregna Ampanjakany Fanjakan-Jagnahary i Jesosy, izikoà fa niherigna tagny an-dagnitra. (Hebreo 10:12, 13) Namian’i Jehovah an’i Jesosy taminy 1914 ny fahefagna nampagnantigneny ananjy. Nagnampôgna taminjey de nanjaka tagny an-dagnitra i Jesosy, le Ampanjaka voafidin’i Jehovah.—Daniela 7:13, 14.

3. Nifidy lilahy amboàna viavy tsy mivadika avy taketo ambôny tany koà i Jehovah, halefa agny an-dagnitra. Hanjaka miaraka amy Jesosy zareo avakeo ho ampanjaka sady mpitsara amboàna mpisorogna ho an’ôlombelogna. (Lioka 22:28-30; Apokalypsy 5:9, 10) “Ondry vitsy” ny nagnantsôvan’i Jesosy ny ôlogna hiara-manjaka aminanjy reo. Misy 144 000 ny isan-jareo io.—Lioka 12:32; Apokalypsy 14:1-3.

4. Nanôra an’i Satana amboàny anjeliny tsy manjary fagnahy avy tagny an-dagnitra ho aketo ambôny tany i Jesosy, izikoà izy vô lasagna Ampanjaka. Zegny ny mahatônga ny fiegnana aketo ambôny tany naheratsy de ratsy, nagnampôgna tamy 1914. (Apokalypsy 12:9, 12) Efa manjaka i Jesosy avahizo satrià agnisany “famantarana” amin-jegny ny ady, ny silôgna, valagn’aretigna avakeo ny fitomboany tsy fagnarahan-dalàgna. Sady efa tsy hadigny ela eky de ho fogna raha tsy manjary jiaby misy avahizo reo.—Matio 24:3, 7, 8, 12; Lioka 21:10, 11; 2 Timoty 3:1-5.

5. Hitsaren’i Jesosy ny ôlogna tsy ho ela, karaha ny fagnavahagna ondry amina bengy ny hagnanovany ananjy. Ny “ondry” de vahoakany hita fô tsy mivadika aminanjy. Zareo ny hahazo fiegnana mandrakizay aketo ambôny tany. “Bengy” ndreka izakagna le tsy magneky ny Fanjakan-Jagnahary. (Matio 25:31-34, 46) Ho foagnan’i Jesosy tsy ho ela zegny karaha bengy jiaby. (2 Tesalonianina 1:6-9) Tsy mentsy mitandregny ny hafatra mikasika ny Fanjakan-Jagnahary sady magnano raha mifagnaraka amy zay nianaranô anô, izikoà te ho agnisany ondrin’i Jesosy.—Matio 24:14.

Tsisy fankahalagna na fagnavakavahagna koaza erika izikoà fa i Jesosy ny mpitôndra

6. Voazarazara hanjary firenegna maro samby managna ny fanjakagnany aby ny tany avahizo. Maheky anefa reo firenegna reo miady. Hisoàfagna Fanjakan-Jagnahary anefa reo fanjakan’ôlombelogna jiaby reo. Izy reka foagna fitondram-panjakagna hitôndra ny tany jiaby aminy hoavy. (Daniela 2:44) Amy zay fotoagna zay, na ny ady na ny fandikan-dalàn-Jagnahary avakeo ny fijaliagna de samby tsy hoisy koaza. Hiara-miegna am-pilaminagna sady am-piresan-tsegna ny ôlo-jiaby!—Mika 4:3, 4.

7. Agnatiny Fanjakagna Arivo Tôgnan’i Jesosy, ho tanteraka ny ôlombelogna tsy mivadika, sady hanjary paradisa ny tany jiaby. Ho efan’i Jesosy aby ny raha jiaby nasen-Jagnahary nanoiny, amy farany arivo tôgna hitondrasany io, ka amy zay fotoagna zay i Jesosy de hagnerigna amin’Iabany io Fanjakagna io. (1 Korintianina 15:24) Magnino tsy ampahafantarigna ny raha anoiny Fanjakan-Jagnahary ny havagna amboàny ôlogna fantanô?

Copyright © 2009 Watch Tower Bible and Tract Society of Pennsylvania. All rights reserved.