Zôvy mô i Jesosy Kristy?

1. Talôhan’i Jesosy tônga taketo ambôny tany, de efa fagnahy tagny an-dagnitra takagny izy. Voalôhany tamin-draha jiaby namboarin-Jagnahary izy, de nantsôvigna hoe “talagnôlo” amy Zana-Jagnahary. (Kolosianina 1:15; Apokalypsy 3:14) I Jesosy izy reka foagna zegny zanaka namboarin-Jagnahary manôkagna. I Jesosy no nampiasen’i Jehovah, izikoà fa nagnamboatra raha jiaby tagny an-dagnitra avakeo taketo ambôny tany izy. Tsiapôla lasagna ôlombelogna i Jesosy taminjey. (Ohabolana 8:22-31; Kolosianina 1:16, 17) Nampiasen-Jagnahary koà i Jesosy ho mpitôndra teniny matomboka, zegny antony nagnantsôvagna ananjy hoe “ny Teny.”—Jaona 1:1-3; Apokalypsy 19:13.

2. Nasen-Jagnahary enga aketo ambôny tany ny zanagny. Tsy ôlombelogna iaban’i Jesosy, satrià Zagnahary no namindra ny egnan-janagny io tagnaty kibon’i Maria. Zegny antony tsy nandovàny ota na taketra. Misy anton-draha telo nagnasan-Jagnahary an’i Jesosy enga aketo ambôny tany: 1) Mbôrakoà hampianatrantsika ny marigna mikasika Zagnahary (Jaona 18:37), 2) mbôrakoà tegna tsy hivadika amin-Jagnahary de alentsika tahaka (1 Petera 2:21), avakeo 3) mbôrakoà angala antsika aminy ota amboàna fahafatesagna, amy sorogna egnany nanoiny. Ino mô antony ilagnan-jegny?—Matio 20:28.

3. Le tsy nagnikiàn’i Adama ny didin-Jagnahary, no zakeny Beboly hoe “ota.” Voahôzogna ho foaty izy vokatry zegny. (Genesisy 3:17-19) Izikoà fa tsy nahefa raha jiaby nangahoin-Jagnahary taminanjy izy de nanjary tsy tanteraka. Naheantitra tsihelihely izy afaràny de maty. Namindran’i Adama taketra ny taranakananjy jiaby, de zegny mahatônga antsika maheantitra de marary avakeo ho foaty. Akôry foagna arika zegny fômba azo agnavôtagna ôlombelogna?—Romanina 3:23; 5:12.

4. Na i Adama na i Jesosy de samby ôlombelogna tanteraka. I Jesosy ndreka anefa tsy nagnano karahan’i Adama, fô izy tegna nagneky Zagnahary sambà nampijaligna mafy be aza. Avy takeo egnan’i Jesosy tanteraka igny de manjary anoigna sorogna mbôra andoavagna fahotan’i Adama. “Vonjy” le agnantsôvany Beboly ananjy io. Vokatry zegny de manjary alagna tamy fagnozôgnana ho foaty ny taranak’i Adama. Manjary mahazo famelan-keloka zegny jiaby mino an’i Jesosy, avakeo koà amiagna fiegnana mandrakizay.—1 Timoty 2:5, 6; Jaona 3:16; Romanina 5:18, 19.

Agnisany fanompoagna nanoin’i Jesosy ny fampianaragna, fagnanovagna raha mahamagnana, avakeo nagnomiazany egnany ho antsika

5. Tamy Jesosy mbôla taketo ambôny tany de nampahivagna ôlogna narary, nagnomià hanigna ôlogna vasilôgna, avakeo nampihegna herin’agnina. Nisy koà ôlo-maty nivilôminy. Nagnino mô i Jesosy nagnano raha mahamagnana? Nagnano raha mahamagnana izy satrià: 1) Nahinakinaka izy nizaha ôlogna nijaly, de tiany agnampy anjareo. 2) Raha nahamagnana nanoiny regny agnaporofoany amy maha zana-Jagnahary ananjy. 3) Iregny raha mahamagnana regny magnatoro raha tiany hanoigna amin’ôlombelogna magneky izikoà fa tônga Ampanjaka ny tany izy.—Matio 14:14; Marka 2:10-12; Jaona 5:28, 29.

6. Izikoà fa maty i Jesosy de nivilômin-Jagnahary avakeo naherigna ho raha managnegna tsy hita maso tagny an-dagnitra. (1 Petera 3:18) Nitidren-Jagnahary ho Ampanjaka izy tato afara. Angala fijaliagna amboàny raha tsy manjary jiaby ambôny tany aketo i Jesosy tsy ho ela.—Salamo 37:9-11; Ohabolana 2:21, 22.

Copyright © 2009 Watch Tower Bible and Tract Society of Pennsylvania. All rights reserved.