Do Bubulö Ryöju Keri lo To’diri Ada?

1. Yesu köju lo suluja keri geleŋ lo Kristiani lo to’diri. Sona köti i lo lor mugun, kode teŋ, na kakwakwasak ti Yekowa Ŋun ködyö gwon geleŋ tuŋ. (Yoane 4:23, 24; Epeso 4:4, 5) Bibilia na todindyö adi ŋutu ku’dik tuŋ logon gwon i kiko lo tu i gwiliŋet.—Matayo 7:13, 14.

2. Bibilia na a ’beron keju adi i mukök na twan na luyökie, todinesi ti ’buröt ko konesi nagon a lege ti tokristiani mo popo madaŋ madaŋ i lukata na momoret na Kristiani. A ŋutu mo pikundye kayupök kaŋo anyen kebbu se i pirit na Kristo. (Matayo 7:15, 21-23; Konesi 20:29, 30) Ŋina a kwe na tindu yi i meddya na keriat jore lo liŋundyö adi se a Kristiani. Yi ŋona bubulö gwulu’ya Kristianijin ti to’diri ada?

3. Kweyet na kweja Kristianijin ti to’diri na puruun kaŋo na a gwon nase ko nyarju na to’diri kase kiden. (Yoane 13:34, 35) Lepeŋat ako todinö i yeyeju adi se a lo’but lwölwöŋ ŋutu ti kulye gweyarijin kode buya lo ’böriköt. Lepeŋat köti ako tödinö anyen mandu ŋutu lo po i kulye jurön. (Konesi 10:34, 35) Ko ŋina kwe lepeŋat ti morakindya i gor. Kristianijin ti to’diri kon ’börik gwoso luŋasirik ko kiasirik.—1 Yoane 4:20, 21.

Kristianijin ti to’diri nyanyar ’börik kukuk Bibilia, ko totokujö kulya ti Tumatyan na Ŋun

4. Nene gwuluet na keri lo to’diri adi ŋutu kanyit ködyö kukuk Bibilia parik. Lepeŋat wuwu nye gwoso a Kulyaet lo Ŋun ko yuyup ŋo na jam nye. (Yoane 17:17; 2 Timoteo 3:16, 17) Lepeŋat ’dep Kulyaet lo Ŋun a ŋo lo ruruwan lwölwöŋ yeyeesi kode lötiöt ti ŋutu. (Matayo 15:1-3, 7-9) Lepeŋat mörju kebbu na Bibilia i gwiliŋesi kase ti perok liŋ. Ko ŋina kwe lepeŋat ti tokujö nene ŋo geleŋ a kondi nene nagon ka’de.—Tito 1:15, 16.

5. Keri lo to’diri agu ködyö köti bubu karin ti Ŋun. (Matayo 6:9) Yesu a tikin karin ti Ŋun, Yekowa, i dena ko kulye. Kristianijin ti to’diri ködyö kondya sona köti. (Yoane 17:6, 26; Roma 10:13, 14) Ŋona ŋutu kasu kiden a ko ŋa logon tutukökindyö karin ti Ŋun i kulye?

6. Kristianijin ti to’diri ködyö tokujö kulya ti Tumatyan na Ŋun. Yesu a kondya sona. Lepeŋ i diŋitan liŋ jambu kulya ti Tumatyan. (Luka 8:1) Lepeŋ a sarakin kajujumuk kanyit i tokujö na ŋilo loŋe lo geleŋ lo i kak ’bukuluŋ. (Matayo 24:14; 28:19, 20) Kristianijin ti to’diri yubbö adi Tumatyan na Ŋun ka’de nye mo na joundya taliŋ na tugwakan ko ’busan i na kak.—Saumajin 146:3-5.

7. Ti kajujumuk ti Yesu ködyö tine gwon a swöt lo na kak naron. (Yoane 17:16) Lepeŋat ti morakindya i kulya ti tetenesi ti miri lo na kak ko yöyöŋesi ti ŋutu. Lepeŋat papa löti, konesi, ko yeyeesi na pepeŋga nagon gwon a bur i kak. (Yakobo 1:27; 4:4) Do ŋona bubulö gwulu’ya ŋutu ti keri geleŋ kasu kiden logon ko kine kweyesi ti Tokristiani na to’diri?

Copyright © 2006 Watch Tower Bible and Tract Society of Pennsylvania. All rights reserved.