Konesi Nagon Ŋun Maman

1. Kalipönök ti Ŋun nyanyar ŋo na’but. Ama ti lepeŋat köti jujumbi mandu na ŋo naron. (Saumajin 97:10) Ŋina nyönyögu paju na kune konesi nagon Ŋun maman. Kune ti kin konesi a nyo?

2. Wutön: Doto ko ŋuto narakwan i ŋerot na toyemaki, lubö, doto ko kijakutat, doto ko kiaser, ko tolup na ŋutu lyan kine liŋ a toronjin narok parik ko Ŋun i komoŋ. (Lewi 18:6; Roma 1:26, 27; 1 Korinto 6:9, 10) Ko lomurek ako toyem ama si’da i pirit na geleŋ, se agu ködyö rerekin kode bia se totoyem i saret lo miri.—Ebere13:4.

Ŋun maman meran, koko’ya, gumba na guralan ko konesi ti tukaŋan

3. ’Buröt, Gumba na Gumar, Koko’ya: Yekowa Ŋun ti bulö ’buröt. (Tito 1:2) Ŋutu logon ’de’dekan rukö ko lepeŋ ködyö gwon pajo i kulya ti buröt. (Tolupesi 6:16-19; Kolosai 3:9, 10) Kikolin gumesi ti gumar liŋ a goma. Ko ŋina kwe Kristianijin ti ŋarju gumba na gwiyarijin liŋ ti gumar, lotari, wökön i rödu ko kusanjin, ko kune guralan na luŋu a bingo. (Epeso 5:3-5) Köti Kristianijin ti koko’ya. Lepeŋat ti gwörö ŋo logon se aden adi kokole kode ’dumadu kule ŋo ’bak pija.—Yuörö 20:15; Epeso 4:28.

4. Woran ko Maraŋesi, Tukaŋan: Woran nagon ’bak teŋet bubulö joŋga na ŋutu i konesi ti tukaŋan. (Suluet 4:5-8) Ŋuto logon a kaŋa ti bulö gwon a ju lo Ŋun. (Saumajin 11:5; Tolupesi 22:24, 25) Ropakindya a naron kode nyökökindyö toron ko ŋo narok nagon kulye kokonakin yi.—Tolupesi 24:29; Roma 12:17-21.

5. Torja ko Mian ko To’bunuk: Kulye ŋutu luŋgu riŋitön ti mulökö anyen mörju toke’ya na gilöjin. Kulye torja merok kase ko mian anyen gigilö kode anyen tatuja se. Riŋit nagon i ki’diŋ na kine konesi liŋ a Satani. Ko ŋina kwe Kristianijin ködyö ti bulö kondya ma’di swöt lo kine ŋo. (Nyökit 18:9-13) Si’da nyona ko Yekowa nye nagwon a gayet na’but parik i kulya ti toresi ko mian nagon kule ’dek konakindya yi.—Tolupesi 18:10.

6. Meran: Ti gwon a toron i möju na binyo ku’dik, yawa, kode kunie gweyari ti yawa na ’du’duyu. (Saumajin 104:15; 1 Timoteo 5:23) Ama möju parik ko meran a naron ko Ŋun i konyen. (1 Korinto 5:11-13; 1 Timoteo 3:8) Möju na lwölwöŋgu parik bubulö körju ’busan na mugun inot ko kökör ’baŋ inot. Nye köti bubulö tindu do i ’doro wulek i kunie temesi.—Tolupesi 23:20, 21, 29-35.

7. Ŋutu logon kokondya ŋo nagon Ŋun a kulya adi a narok mo “ti ruddya tumatyan na Ŋun.” (Galatia 5:19-21) Ko do ’diri nyanyar Ŋun ko ’de’dekan tulyöŋgu lepeŋ, do bubulö ŋanyundya mugun a luitöt i kine konesi. (1 Yoane 5:3) Jujumbi mandu na ŋo nagon Ŋun kulya adi a naron. (Roma 12:9) Tojuline ko ŋutu logon gwon ko gwiliŋesi lo gwoso ti Ŋun. (Tolupesi 13:20) Julin logon a Kristianijin loggo bubulö jukin gwon a pipilet na ŋariet. (Yakobo 5:14) I loki na ŋo liŋ, togwi’diki yenet inot i ŋariet na Ŋun na po i kiko lo kwakwadu.—Pilipoi 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.