Mijun Nyona ko Ŋun i Kwakwadu

1. Kwaset gwon a jambu ko Ŋun ko tokoyokan. Do agu ködyö kwakwadu Ŋun i diŋitan liŋ. Sona a do gwe nyona ko lepeŋ gwoso ko ju ilot lo nyanyara. Yekowa a duma parik köti ko riŋit, ama lepeŋ nyuŋ yiyiŋ kwasesi kayaŋ! Do ŋona kwakwadu Ŋun i diŋitan liŋ?—Saumajin 65:2; 1 Tesalonike 5:17.

2. Kwaset a swöt likaŋ lo momo’yu. Ko ŋina kwe, yi agu ködyö kwakwadu Ŋun geleŋ, logon a Yekowa. Diŋit na gwondi Yesu kak ni na, perok liŋ nye kwakwadu Monye lonyit, ’bayin a lege lele. Yi agu ködyö kondya sona. (Matayo 4:10; 6:9) Ama, kwasesi kayaŋ liŋ agu jama i karin ti Yesu. Ŋina kweja adi yi twötwö pirit gwo’diet na Yesu köti adi yi gwon ko yupet i rubaŋga daket lonyit.—Yoane 14:6; 1 Yoane 2:1,2.

3. Ko yi kwakwadu Ŋun ti jamesi kulo ködyö lupundye kayaŋ i töiliet. Yi ködyö ti jambu kwasesi kayaŋ i ŋo nagon a ’dela i kwinyit kode luŋa kendya se i buk kwakwaset. (Matayo 6:7, 8) Yi bubulö kwakwadu i gwo’diet na kuga nagon yi a ’deggi, i diŋit nagon yi a ’deggi, ko i pirit nagon yi a ’deggi. Ŋun bubulö yiŋga ma’di kwasesi lo jama a lwön kayaŋ i töilyet. (1 Samuele 1:12, 13) Bia a na’but i ryöju na pirit nagwon taliŋ pajo ko kulye ŋutu a yi kirut jambi kwasesi kayaŋ.—Marako 1:35.

4. Kunen kusik ti kulya nagon do bubulö kwakwadu i kulya kase? Ŋo liŋ nagon do a den adi kökör tojulin inot ko lepeŋ. (Pilipoi 4:6, 7) Kwaset miret lo a kweja adi yi agu ködyö bu’ya karin ti Yekowa ko ’deket nanyit. Yi köti bubulö pija lepeŋ i tindu na ’dekesi kayaŋ ti mugun, ako i pitökindyö na torojin kayaŋ, ko ŋariet telet na möriesi. (Matayo 6:9-13) Kwasesi kayaŋ ködyö ti kweja dendya na ’börik ka’de. Yi ködyö kwakwadu i kulya ti ŋo nagon totorukökin ko ’deket na Ŋun.—1 Yoane 5:14.

5. Ko do a ’dekan do bubulö kwakwadu i diŋitan liŋ nagon töili ilot a ’dekuri i tikindya na tinate kode i pupurja na Ŋun. (1 Dekat 29:10-13) Do ködyö kwakwadu i diŋit na gwondi do ko yöyöŋesi ko i diŋit na temari yupet inot. (Saumajin 55:22; 120:1) A na’but bia parik ko do a kwakwadu a kokwe na nyesi do kinyo ilot na. (Matayo 14:19) Yekowa luŋgu yi i kwakwadu “i diŋitan liŋ.”—Epeso 6:18.

6. Kega parik yi agu ’de’dekan kwakwadu ko yi a kondya toron duma. I diŋitan gwoso kine yi agu ködyö mo’yu yatet ko pitet na Yekowa. Ko yi a tukökin lepeŋ toronjin kayaŋ ko i kita parik an yi nyök se, Ŋun “gwon ajo i pitökindyö.”—Saumajin 86:5; Tolupesi 28:13.

7. Yekowa tuŋ yiŋga kwasesi ti ŋutu lo rigwo. Anyen kwasesi kulök böŋö yiyiŋa ko Ŋun, do ködyö mörju parik i twöju na saresi kanyit. (Tolupesi 15:29; 28:9) ’Dek do gwon a lokoyok i diŋit na kwakwadi do na. (Luka 18:9-14) ’Dekan do mömörju i kondya ŋo nagon do a mulun kine. Sona a do mo kwekindye adi do gwon ko yupet ko adi do ’diri kata ko tirikwet i kulya ti ŋo na jam do kine. I ŋilo kiko tuŋ a Yekowa mo rukökindi do kwasesi kunök.—Ebere 11:6.

Copyright © 2006 Watch Tower Bible and Tract Society of Pennsylvania. All rights reserved.