Tumatyan na Ŋun a Nyo?

1. Diŋit na gwondi nye kak ni na, Yesu a todin kakepok kanyit i kwakwadu na Tumatyan na Ŋun. Tumatyan na a miri na sara ko mor. Tumatyan na Ŋun na gwon a miri nagon nene ’bayin nagon gwoso nye. Lepeŋ aje togwi’diki ki yu a mo sarji i loki na na kak. A nye mo toke’yi yi, kode a to’budye karin ti Ŋun a gwe a nake. Anye mo tindi ’deket na Ŋun i kona i kak ni gwoso na konari ki yu nu.—Matayo 6:9, 10.

2. Ŋun ’beron a milyeju adi Yesu mo lo pokin i gwon a Mor lo Tumatyan Nanyit. (Luka 1:30-33) I diŋit na gwondi Yesu kak ni, lepeŋ a kwekin mugun adi nye mo gwon a Kasaranit lokoyok, lo rigwo, ko a loke. Na yitöni nye ki nu, lepeŋ ako tosi’daki ’de’de a Mor i Tumatyan na Ŋun. (Ebere 10:12, 13) I kiŋa 1914, Yekowa a tikin Yesu kido saret nagon Nye ’beron a milyekin lepeŋ nu. Suluja i nu diŋit, Yesu a sarju i ’diko yu gwoso Mor lo Yekowa lo wulwe.—Daniele 7:13, 14.

3. Yekowa köti a wulundyö kulye kayupök lyan ko wate i na kak anyen tu i ’diko. Lepeŋat mo sarju kase Yesu a moran, ka’duŋök ti putesi, ko a koanejin i loki na ŋutu liŋ. (Luka 22:28-30; Kweyatti 5:9, 10) Yesu a gwijö kilo kasarak lo sarju ko nye i Tumatwan nanyit a “teŋ na’dit.” Kenet nase a 144,000.—Luka 12:32; Kweyatti 14:1-3.

4. ’De’de kijek na pokindye Yesu a Mor nu, anye gubundye Satani ko malaikajin kanyit lorok kaŋo i ’diko yu i na kak. Ŋina a kwe na tindu ŋo liŋ gwe a narok kak ni suluja i kiŋa 1914. (Kweyatti 12:9, 12) Möröjin, dyaŋan, twana loggo, ŋöi na toronjin—kine liŋ a swöt lo “kweyet” na kweja adi Yesu lo gwe i sarju köti adi na diŋit aje ’durökin i perok kanyit ti ’dutet.—Matayo 24:3, 7, 8, 12; Luka 21:10, 11; 2 Timoteo 3:1-5.

5. Yöŋgi a na’dit a Yesu mo ’duŋgi putesi ti ŋutu, a mo korji se gwoso na korundi kayukunit köbilu kaŋo i melon na. Kine “köbilu” a se logon mo tojukin ’börik a kölipönök kanyit lo yiyiniki. A se mo wuji gwiliŋit na yeŋ nyin i kak. “Melon” kine a se logon a renya Tumatyan na Ŋun. (Matayo 25:31-34, 46) I diŋit na ŋutut na popo, Yesu mo tutukar se liŋ logwon gwoso melon. (2 Tesalonike 1:6-9) Nyena ko do ’de’dekan gwon a lele lo “köbilu” ti Yesu, do agu ködyö yiyiŋ loŋe lo Tumatyan ko kokon ŋo na jujum do kine.—Matayo 24:14.

I diŋit saret na Yesu, ŋo nagon mo gwe ’bayin a mandu, a ko paju ’bak kwe na kulya

6. Soŋinana kak na a kora i jurön jore. Liŋ geleŋ geleŋ ko miri lonyit. Kilo jurön mömörö ko ’börik i diŋitan ka’de ka’de. Ama Tumatyan na Ŋun mo na ruddya mirilön liŋ ti ŋutu. A nye mo na sarji a miri ka’de i loki na kak ’bukuluŋ. (Daniele 2:44) A mörö, toron, ko tukaŋan mo gwe ’bayin kwöŋ. A ŋutu liŋ mo si’dani i pirit geleŋ ko taliŋ ko a morja a ŋo geleŋ.—Mika 4:3, 4.

7. I diŋit nagon Yesu Sarji ko Kiŋajin Alip nu, a ŋutu lo yubö mo gwe a loke, a kak ’bukuluŋ köti mo worani a paradiso. Nyena i ’dutet na kulu kiŋajin alip nu, Yesu mo aje kon ŋo liŋ nagon Ŋun a takin lepeŋ i kondya. I mukök na ŋina anye mo nyökökindye Tumatyan bot ko Monye lonyit. (1 Korinto 15:24) Nyo do ti takin julin kulök ko se logon do nyanyar ŋo nagon Tumatyan na Ŋun mo kokon?

Copyright © 2006 Watch Tower Bible and Tract Society of Pennsylvania. All rights reserved.