’DUTET NA KIKO
YUPET LO ’BURÖT
GWE NYONA!

Kiko yupet lo ’buröt lo a nyo? Teili ilot ŋona mimien i kine ŋo narok na kokonatu ko ŋuto kayupök ti ŋun kilo le? Kine möröjin se ko tokujönösi ko köriesi nagon kokonatu ko se lo luŋgu ’börik adi se yuyup ŋun kilo ŋona ’diri kökör yeyeesi kunök le, ko do yeyeju kulya ti torigwo? Ko nyo kiko yupet lo puru a kwe na kine yöyöŋesi najore?

Toron na ’bain a na yupesi liŋ, ama a na kikolin yupesi ti ’buröt. Yesu Kristo, ŋuto lo Ŋun lo kukwön ko twötwöi ko nagalaŋ na ŋuto, köju a jambu adi, kiko yupet lo ’buröt konesi kanyit a narok gwoso nagon “ködini loron radan ludweki lorok” na. (Matayo 7:15-17) Kulon ludweki logon kiko yupet lo ’buröt toworundya se?

Kiko Yupet lo ’Buröt

KIKO YUPET LO ’BURÖNIT ’YODDYA MUGUN KO KULYA TI GOR SE KO ’DEPPA NA JUR: Nene buk na luŋu a Asiaweek a wurjö adi, “ŋuto lo magora tumatyan nyu i jur lo Asia se ko i kune piritön, tokitaju yeyeesi ti yupet na kilu ŋuto anyen se suggi ’dekesi kase.” Ko ŋina kwe, nu buk a kunyarju adi: “kak na ’deke mamala.” Lele kayupönit temejiktyo lo kukwön i jur lo Amerika ajambu adi: “Kiko logon togwo’darikini kilo ŋuto katokujönök ti kulye kilo, a tatua nase kaŋo”. Kine kulya ti lepeŋ nyöyöggu nyo? Kweja adi “ti kilo ŋuto tatuani kaŋo i karen ti ŋun.” Ama kölumbö, Bibilia na adi: “Ko ŋuto logon kulya adi Nan nyanyar Ŋun, kudyakan amandi luŋaser, lepeŋ a ’burönit.” (1 Yoane 4:20) Yesu ko mugun a kulya adi: “Nyare ta nyar merok kasu.” (Matayo 5:44) Do deden kikolin yupesi muda logon ŋuto kase ’dakakindya ’börik i kulya ti gor?

KIKO YUPET LO ’BURÖT TOREKINDYA TODINESI ’BURÖNÖK: Kikolin yupesi jore todindyö adi ködudwö na kode mulökötyo, a lu swöt lo ŋuto logon ti meta, ama yeyeŋoro gwoloŋara jörun i mukök na twan na ŋuto. Kikolin yupesi jore tokitaju ŋina todinet anyen telundye ŋuto kase i swöt, ko anyen se ryöndi gurut i diŋitan kwakwasesi nagon se momo’yi kine ködudwölön nagon aje kö’yu ko monye kase kine. Ama nagon Bibilia na todindyö todinet nagon ka’de adi: “Ŋuto lo nyökundyö katoronyanit bot i kiko lo lyaŋgi lepeŋ lo aje lwök ködudwö na ŋilo ŋuto i twan.” (Yakobo 5:20) “Kogwon ŋuto logon jörun kulo deden adi se mo twatwata ama ŋuto lo twatwa ako den nene ŋo kwöŋ.” (Katokuönit 9:5) Yesu köti todindyö adi lotwatwa kulo mo tatoŋiu i twan. Iŋkoi, ’bulit na toŋiu mo gwon ’bain ko ŋuto kulo logon gwon ko ködudwölön na yeyeŋoro gwoloŋ i mukök na twan. (Yoane 11:11-25) Kiko yupet ilot lo todindyö adi ködudwö na ti twan?

KIKO YUPET LO ’BURÖT RUKÖKINDYÖ KULYA TI TOTOLUP: I kulye jurön gwoso i tokoyaŋ na kak, kiko yupet ’borokindya ŋuto lian lo totolup a börik se ko ŋuto wate nagon kondya sona köti ko ’börik, i kita a pasitajin. Köti a ’deke mirijin kase anyen ’burukindya toyem i kiden na ŋilo gweyari lo ŋuto. Juk nagon kikolin yupesi kulye jajambu adi lubbö a ŋo naron, wuddyö a kölökindye kulye temejik kase ti yupet i totolub ko ŋwajik lo’di’dik. Ama Bibilia na ko i to’diri todindyö ada i kulya ti totolup gwoso ŋina? Bibilia na a kwekin koke adi: “Ko kakalakindya ta ’börik, kweja adi kawutejin, ko kakwakwasak ti nyömuejin, kalupejin, ko ŋuto lian lo dodototu ko ’börik ŋuto gwoso kilo mo ti gwon a ŋuto ti tumatyan na Ŋun.” (1 Korinto 6:9, 10) Do deden kikolin yupesi logon rukökindyö lotolup gwoso ŋina kase kiden?

Kikolin yupesi lo radan ludweki lo ’burön gwoso kilo molu kona ada? Yesu a kunyarju adi: “Kaden liŋ logon ti radan ludweki lo’but kilo toko kak, a gubani i kimaŋ.” (Matayo 7:19) Iŋkoi, kine kulya a gwak, kikolin yupesi ti ’buröt mo turö kak a köröni kaŋo! Ama a kine kulya mo gwe ada, ko a kona nase mo gwe nanu? Rukesi ti kine piesi riryie i buk na Kweyatti kepta 17 ko 18.

’Dutet na kiko yupet lo ’buröt mo gwon ada?

Yeyeji kine kulya, adi kawute na wutön parik a si’daki i loki na gworoŋ. Ŋilu gworoŋ ko kusik buryo ko oŋgwora kanyit puök. (Kweyatti 17:1-4) Ŋinu kawute ŋona yuddya ŋa? Adi lepeŋ kata ko kido i “tumatyan ko moran ti kak.” Lepeŋ jupu bongo na’bule na parere, a bökurje mugun ko bökur, ko lepeŋ na a kwörönit duma. A lepeŋ “iŋge togirja jurön liŋ” ko konesi kanyit ti mulökö lorok. (Kweyatti 17:18; 18:12, 13, 23; wuret logon a neŋa ŋilo po kayaŋ.) Bibilia na na ŋarakindya yi i kurundyö adi nu kawute yuddya kikolin yupesi ’burönök ti kak ’bukuluŋ. Lepeŋ na ’bain yuddya kiko yupet geleŋ tuŋ, ama kikolin yupesi liŋ logon konesi kase a narok.

Lu gworoŋ logon kawute nu si’da kanyit loki lu, yuddya riŋitön ti tumatyanjin ti na kak.* (Kweyatti 17:10-13) Kilo kikolin yupesi ’burönök, se lo si’da i loki na lu gworoŋ logon yuddya riŋitön ti tumatyan jin ti na kak, a mörji jujuja ŋilu gworoŋ i yeyeesi ko i kikolin kanyit ’depesi.

Yeŋgi a na’dit, ŋo nene duma ŋina ’du’dukin na tutusörju. “Kilo oŋgwora puök se ko ŋilo gworoŋ, lepeŋat mo lo ŋikin i mandu na ŋinu kawute, ase mo kölökindye lepeŋ na ’bak nene ŋo, a rosoddi boŋgwat kanyit kune kaŋo, a mo nyesi mugun nanyit, a ’yurje lepeŋ ko kimaŋ.” (Kweyatti 17:16) A ’de’de kijek, a kine tumatyanjin ti na kak ni mo ŋiki ko kikolin yupesi ’burönök ki, a körji se kaŋo! Nyo mo na tindu kine kulya gwon sona? Bibilia na jambu i buk na Kweyatti adi: “Ŋun lo tindu kase i teiliet i kondya na yeyeet nanyit.” (Kweyatti 17:17; wuret logon a neŋa ŋilo po kayaŋ.) Iŋkoi, Ŋun mo luluŋ kikolin yupesi ’burönök i putet kogwon se lo gwon a kwe na kine ŋo narok na kakonatu i karen kanyit nye ŋun kine. Anyen torigwo böŋö gwon kata, Ŋun mo tokitaju kilo ŋuto ti kine tutumatyanjin logon totowutön ko ŋina kawute köju kulo, anyen ’duŋökindyö nye Ŋun kulya kanyit i kwe na lepeŋ.

Do ködyö kondya nyo an do ŋarundya ŋinu köriet nagon mo ’dudukin ko ŋuto ti kiko yupet ’burönit ki nu? Luyekie lo ŋun kukuju yi adi: “Po ta kaŋo kanyit ŋini, ta ŋutu kwe.” (Kweyatti 18:4) ’Diri soŋinana gwe a diŋit poniet kaŋo ko kiko yupet ’burönit! Ama ko ŋuto aje po kaŋo, a ŋuto iti da? Kweja adi ’bain i se logon ti yup adi Ŋun kata, kogwon kilo köti de körö kaŋo. (2 Tesalonike 1:6-9) Pirit ’danaet geleŋ tuŋ mo gwe i kiko yupet lo to’diri. Ama a ŋuto kuru kiko yupet lo to’diri lo ada?

Kiko yupet lo to’diri lo ko bubulö ryie ada

Kulon ludweki lo’but logon ködyö kiko yupet lo to’diri toworundya se?—Matayo 7:17.

Kiko Yupet lo To’diri

KIKO YUPET LO TO’DIRI ŊUTO KANYIT TUTUNYAR KO ’BÖRIK: Kakwakwasak ti to’diri ‘ti gwon a swöt lo na kak’ a gwe ’bak kokoresi kase kiden i kulya ti gweyari kode i gwiliŋit si’daet, wo ŋuto kanyit ‘tutunyar ko ’börik.’ (Yoane 13:35; 17:16; Konesi 10:34, 35) Ŋuto ti kiko yupet lo to’diri ti tutatu ko ’börik, ama nagon ŋadi geleŋ nyanyar twan kogwon kulya ti lele lo, ko ködyö a’dekarikin sona.—1 Yoane 3:16.

KIKO YUPET LO TO’DIRI KUKUK KO YUYUP KULYAET LO ŊUN LO ADI A GWAK: I pirit nagon lepeŋat todinyö “keriat kode todinesi ti ŋuto gwoso se a todinesi na po ko Ŋun,” kiko yupet lo to’diri lo todinesi kanyit gwi’dikin go i Bibilia nagon a kulyaet lo Ŋun lo. (Matayo 15:6-9) Ko nyo? Kogwon “wuresi liŋ nagon Ŋun lo yukundya kanyit i kutuk kune gwon ko ’bulit i todinörikin ko i ririŋarikin ko i yuyukörikin ko i tojumukie na ŋuto i löti lo rigwo.”—2 Timoteo 3:16.

KIKO YUPET LO TO’DIRI LO TOGO’YU MIDIJIK A JUJUKINDYE ’DEPA NA GWILIŊIT LOKE: Kiko yupet lo to’diri lo todindyö adi ŋuto “lyan ködyö nyanyar wate kase sona gwoso na nyarji se mugunya kase na,” köti a ŋarakindye ŋuto ‘wate i gwon ko twöju na lyan kase,’ ko a todindye ŋwajik “i twöju na kayuŋwök kase.” (Epeso 5:28, 33; 6:1) Köti se logon a temejik i kiko yupet lo to’diri ko a koraki kitajin kulo, gwiliŋiesi kase ködyö gwon a lo’but anyen gwon a miresi i kulye.—1 Timoteo 3:1-10.

Lele kiko yupet kata logon kilo kikolin gwiliŋiesi riryie i lukata? Buk nene na luŋu a Holocaust Politics jambu adi “ko ködyö ŋuto jore jujum kondya todinesi ti ŋo na todin Katokorak ti Yekowa kune ko a kone kon kase i gwiliŋiesi, körö kaŋo na tito ti kulye ŋuto aka kode tatua kaŋo giri na lele gwegari lo ŋuto aka, ködyö gwon ’bain i kak ni.”

Iŋkoi, i jurön 235 ti kak, Katokorok ti Yekowa ’bain ka’de todindyö kikolin gwiliŋiesi loke logon i Bibilia ni kulo, ama a lepeŋat köti si’dani ko a kondi gwoso na sarji Bibilia se na kase i gwiliŋiesi. Yi de kulya adi ti ta gwe apurwat i jurja na Katokorak ti Yekowa anyen ŋarakindya ta jujumbu dendya nyo nogon ŋun ’de’dekan konut anyen do bubulö twöju lepeŋ i kiko logon lepeŋ ruruk lo. Soŋinana, ’bak karakin, na gwe a diŋit nagon do ködyö kondi sona. Böŋö an do kakarakin kogwon ’dutet na kiko yupet lo ’buröt gwe nyona!—Jepenia 2:2, 3.

*  Anyen do kurundyö najore ti kine kulya, meddi buk na luŋu ko kutuk na engereja a Revelation—Its Grand Climax At Hand! na wurö ko Katokorok ti Yekowa.