Dannako ni laada minnu ka go Ala ye

Ala tɛ Sabaya ye

1. Dannakow ni laadaw bɛɛ tɛ kojugu ye. Nka, Ala tɛ sɔn u la n’u bɛ bɔ diinɛ nkalonma na, ani n’u bɛ Bibulu kalansiraw sɔsɔ.—Matiyu 15:6.

2. Sabaya: Yali Jehowa ye Sabaya ye n’o kɔrɔ ye mɔgɔ saba kɛlen Ala kelen ye wa? Ayi! Jehowa, n’o ye Fa ye, o ye “Ala sɛbɛ kelenpe ye.” (Yuhana 17:3; Marka 12:29) Yesu y’a Denkɛ fɔlɔ bangelen ye, wa, Yesu sɔnnen bɛ Ala ka kuntigiya ye. (1 Kɔrɛntekaw 11: 3) Fa ka bon ni Denkɛ ye. (Yuhana 14:28) Hakili senu tɛ mɔgɔ ye nka o ye Ala ka barika walekɛbaatɔ ye.—Jenɛse 1:2; Kɛwalew 2:18

Nɔwɛli ani Paki bɛ bɔ fɔlɔfɔlɔ diinɛ nkalonmaw na

Dalilu si tɛ yen ka suw bato walima ka siran u ɲɛ

3. Nɔwɛli ani Paki: Yesu ma wolo Desanburukalo tile 25. A wolola Ɔkutɔburukalo tile fɔlɔ masurunna na, san waati min na sagagɛnnaw b’u ka sagakuluw to kɛnɛma, su fɛ. (Luka 2:8-12) Yesu ma Krecɛnw ci u k’a wolodon seli kɛ abada. Nka, a y’a fɔ a ka kalandenw ye k’u k’a ka saya hakilijigin labato, walima k’u hakili to o la. (Luka 22:19, 20) Nɔwɛli n’a laadaw bɛ bɔ fɔlɔfɔlɔ diinɛ nkalonmaw de la. O fana ye tiɲɛ ye Paki laadaw la, i n’a fɔ fanw ni sonsanniw, minnu sen bɛ u la. Krecɛn fɔlɔw tun tɛ Nɔwɛli, walima Paki seliw kɛ, sisan fana, Krecɛn lakikaw tɛ u kɛ.

4. Wolodon sanyɛlɛma seliw: Wolodon sanyɛlɛma seli fila minnu dama kofɔlen bɛ Bibulu kɔnɔ, olu kɛra mɔgɔw fɛ minnu tun tɛ Jehowa batobagaw ye. (Jenɛse 40:20-22; Marka 6:21, 22, 24-27) Krecɛn fɔlɔw ma wolodon sanyɛlɛma seli kɛ. Laada min ye ka wolodon sanyɛlɛma seli kɛ, o bɔra fɔlɔfɔlɔ diinɛ nkalonmaw de la. Krecɛn lakikaw bɛ fɛnw ni ɲɔgɔn na, ka waati duman kɛ ɲɔgɔn fɛ waati dɔ wɛrɛw la san kɔnɔna na.

5. Suw ɲɛsiranya: Suw tɛ se ka fɛn si kɛ, walima ka fɛn si dɔn. An tɛ se k’u dɛmɛ, wa, u tɛ se ka kojugu kɛ an na. (Zaburu 146:4; Eklesiaste (Waajulikɛla) 9:5, 10) Ni bɛ sa. A tɛ to ɲɛnamaya la saya kɔfɛ. (Ezekiɛl 18:4) Nka, tuma dɔw la, mɛlɛkɛ jugu minnu bɛ wele jinɛw, u b’u yɛrɛ kɛ i n’a fɔ furew. Laada minnu sinsinnen bɛ suw ɲɛsiranya walima suw batoli kan, olu man ɲi.—Esayi 8:19.

6. Kuruwa: Yesu ma sa kuruwa dɔ kan. A sara potoju walima jiri dɔ kan. Bibulu caman kɔnɔ, gɛrɛkikan daɲɛ min bayɛlɛmana k’a kɛ “kuruwa” ye, o kɔrɔ ye jiri bolo kelen dɔrɔn de ye. Kuruwa taamasiyɛn bɛ bɔ fɔlɔfɔlɔ diinɛ nkalonmaw de la. Kuruwa tun tɛ Krecɛn fɔlɔw ka diinɛ na, wa, u m’a bato. O la sa, i yɛrɛ ɲɛna, yali a ka ɲi kuruwa ka sɔrɔ bato la wa?—Dutɛrɔnɔmɛ 7:26; 1 Kɔrɛntekaw 10:14.

7. A bɛ se ka gɛlɛya ka nin dannakow, walima nin laadaw dabila. I balimaw n’i teriw bɛ se k'a ɲini k’a don i kun na k’i kana i ka dannakow bila. Nka, k’i ko diya Ala ye, o ka fisa k’i ko diya hadamadenw ye.—Ntalenw 29:25; Matiyu 10:36, 37.

Copyright © 2006 Watch Tower Bible and Tract Society of Pennsylvania. All rights reserved.