I surunya Ala la delili sababu fɛ

1. Delili ye ka kuma Ala fɛ ni majiginnenya ye. I ka kan ka Ala deli tuma bɛɛ. O cogo la, a bɛna kɛ i teri ye min ka surun i la. Jehowa ka bon haali, wa, a ka sebagaya fana ka bon. O bɛɛ n’a ta, a b’an ka deliliw lamɛn dɛ! Yali i bɛ Ala deli tuma bɛɛ wa?—Zaburu 65:3; 1 Tesalonikekaw 5:17.

2. Delili ye an ka bato kɔnɔfɛn dɔ ye. O la, an ka kan ka Ala kelenpe de deli, n’o ye Jehowa ye. Yesu tun bɛ dugukolo kan tuma min na, a tun b’a Fa deli tuma bɛɛ. A tun tɛ mɔgɔ wɛrɛ deli abada. An ka kan k’o ɲɔgɔn de kɛ. (Matiyu 4:10; 6:9) O na ta o ta, an ka kan k’an ka deliliw bɛɛ kɛ Yesu tɔgɔ la. O b’a jira k’an bɛ Yesu jɔyɔrɔ bonya, wa, k’an limaniyalen don a ka kunmabɔ saraka la.—Yuhana 14:6; 1 Yuhana 2:1, 2.

3. N’an bɛ Ala deli, an ka kan ka kuma Ala fɛ n’an dusukun ye. An man kan ka delili durusilenw fɔ an kun fɛ, walima k’u kalan delili kitabu dɔ kɔnɔ. (Matiyu 6:7, 8) An bɛ se ka Ala deli waati bɛɛ la, yɔrɔ bɛɛ la, ani cogo bɛɛ la, nka ni bonya ye. Ala bɛ se k’an ka kɔnɔna deliliw yɛrɛ lamɛn minnu bɛ bɔ an dusukun na. (1 Samuɛl 1:12, 13) A ka ɲi ka yɔrɔ lafiyalen sɔrɔ min mabɔlen bɛ tɔw la walasa k’i yɛrɛ ka deliliw kɛ.—Marka 1:35.

4. I bɛ se ka Ala deli mun ko la? Fɛn o fɛn sirilen bɛ e ni Ala ka teriya ko la. (Filipekaw 4:6, 7) Yesu ye delilicogo min jira an na, o b’a jira k’an ka kan ka Ala deli a tɔgɔ ko la n’o ye Jehowa ye, an’a sagonata ko la. An bɛ se fana k’a deli walasa a k’an farikolo magoɲɛfɛnw di an ma, k’an ka jurumuw yafa, k’an dɛmɛ an k’an kologɛlɛya kɔrɔbɔli la. (Matiyu 6:9-13) An man kan ka Ala deli ni hasidiya ye. An ka kan k’a deli fɛnw dɔrɔn na minnu bɛnnen bɛ Ala sago ma.—1 Yuhana 5:14.

5. I bɛ se ka Ala deli tuma o tuma n’i dusukun b’i bila ka barika da Ala ye, walima k’a tanu. (1 Tilew Kibaru 29:10-13) I ka kan ka Ala deli tuma min na kunkow b’i da la ani waati min na i ka limaniya bɛ ka kɔrɔbɔ. (Zaburu 55:23; 120:1) A bɛnnen bɛ i ka Ala deli sanni i ka dumuni kɛ. (Matiyu 14:19) Jehowa b’a ɲini an fɛ an k’a deli “tuma bɛɛ.”—Efesekaw 6:18.

6. An mago b’a la ka Ala deli kɛrɛnkɛrɛnnenya la n’an ye jurumuba dɔ kɛ. O tuma na, an ka kan ka Ala ka makari n’a ka yafa deli kosɛbɛ. N’an bɛ jɔ an ka jurumuw na a ɲɛna, n’an b’an seko damajira kɛ walasa an kana segin u kan tun, Ala “bɛ sɔn ka yafali kɛ.”—Zaburu 86:5; Ntalenw 28:13.

7. Jehowa bɛ mɔgɔ tilennenw dɔrɔn de ka deliliw lamɛn. Walasa Ala k’i ka deliliw mɛn, i ka kan k’i seko bɛɛ kɛ, k’i ka ɲɛnamaya kɛcogo kɛɲɛ ni Ala ka sariyaw ye. (Ntalenw 15:29; 28:9) I ka kan k’i majigin n’i bɛ Ala deli. (Luka 18:9-14) I bɛ Ala deli fɛn minnu na, i ka kan k’i ɲɛ don o la. I bɛna a jira o cogo k’i limaniyalen don, wa, ko tiɲɛ na, i bɛ min fɔ i b’o ta ni sɛbɛ ye. O tuma dɔrɔn de la, Jehowa bɛna i ka deliliw jaabi.—Heburuw 11:6.

Copyright © 2006 Watch Tower Bible and Tract Society of Pennsylvania. All rights reserved.