Bibulu bɛ mun de fɔ tigitigi?

N’I ye zurnali kalan, walima ka tele lajɛ, walima ka arajo lamɛn, an bɛ farinyakow ani kɛlɛw de mɛn ani tubabuw bɛ min wele ko terrorisme. I ka miiri i ka kɔnɔnagankow la. A bɛ se ka kɛ k’i degunnen don bana juguman dɔ fɛ walima i diyanyɛmɔgɔ dɔ ka saya fɛ. Laala i bɛ ikomi mɔgɔɲuman Job, o min y’a fɔ ko ale tun “na fa [ . . . ] tɔɔrɔ kow la.”—Job 10:15.

I yɛrɛ ɲininka nin fɛnw na:

• Yala Ala sago tun ye nin de ye ne kama ani hadamaden bɛɛ kama wa?
• Ne bɛ se ka dɛmɛ sɔrɔ min, walisa ka ne ka tɔɔrɔ ɲɛnabɔ?
• An bɛ se k’an jigi da a kan ko lafiya bɛna kɛ dugukolo kan wa?

Bibulu bɛ nin ɲininkaliw jaabi ɲuman di an ma.

BIBULU B’A FƆ KO ALA BƐNA NI A KA YƐLƐMA YE DUGUKOLO KAN.

“A na ɲɛji bɛɛ cɛ ka bɔ u ɲɛ la. Saya tɛna kɛ tun, su kasi fana tɛna kɛ tun, wala kasikan wala dimin.”—Jirali 21: 4

“Senkelenw na u panpan i ko minan.”—Esayi 35:6

“O tuma la fiyentɔw na yeli kɛ.”—Esayi 35:5

“Mɔgɔ salen minnu bɛ kaburuw kɔnɔ . . . U na bɔ yen.”—Yuhana 5:28, 29

“O dugu mɔgɔw si tɛna a fɔ ko ale man kɛnɛ.”—Esayi 33: 24, BS.

“Sɛnɛfɛnw na caya jamana kɔnɔ.”—Zaburuw 72: 16

BIBULU BƐ MIN FƆ AN YE, I KA NAFA BƆ O LA

I kana a fɔ joona ko fɛn minnu jirala ɲɛ 4nan ni 5nan na, k’olu ka ɲi kosɛbɛ ka kɛ tiɲɛ ye. Ala ye layidu ta ko a bɛ o kɛ, wa Bibulu b’a fɔ k’a jɛya a bɛna o kɛ cogo min na.

Bibulu bɛ fɛn caman wɛrɛw fɔ fana ka tɛmɛ o kan. A b’a ɲɛfɔ an bɛ se k’an ka ɲɛnamaya kɛ hɛrɛ la cogo min na kabini sisan. An ka miiri waati dɔɔnin kɔnɔ i ka haminakow la ani i ka kunkow la: wariko gɛlɛya, denbaya ka gɛlɛyaw, bana walima i diyanyɛmɔgɔ dɔ ka saya. Bi bi in na, Bibulu bɛ se k’i dɛmɛ ka o kunkow kun, ani a bɛ se k’i dususaalo bawo a bɛ na ni jaabiw ye nin ɲinikali suguw la:

• Mun na an bɛ tɔɔrɔ?
• An bɛ se k’an ka haminakow kunbɛn cogo jumɛn na?
• Cogo jumɛn na an bɛ se k’an ka denbaya ka hɛrɛ bonya ka taa a fɛ?
• Mun bɛ saya kɔfɛ?
• Yala an bɛna an ka mɔgɔ salenw ye kokura wa?
• An bɛ se ka da la tigitigi cogo di ko Ala bɛna a ka layiduw tiimɛ?

N’i ye nin gafe kalan, o b’a jira k’i b’a fɛ k’a don Bibulu bɛ min fɔ. Nin gafe bɛna i dɛmɛ. I k’a kɔlɔsi ko ɲɛ dugumana na, ɲininkaliw bɛ bɛn dakunw ma. Ɲininkali ni jaabi kɛcogo diyara mɔgɔ miliyɔn caman ye u ka baro kɔnɔna na ni Jehova Seerew ye. An b’a fɛ a ka diya e fana ye. Ala k’i duba waati min na i bɛ k’a ɲini k’a dɔn Bibulu bɛ min fɔ tigitigi !

I K’A ƝINI KA DEGE I KA BIBULU LA

Gafe ani bataki 66 de bɛ Bibulu kɔnɔ. Olu tilalen don tilayɔrɔba ani tilayɔrɔ fitinin ye minnu b’a ɲinini nɔgɔya. Ni Bibulu tɛmɛsira dɔ kofɔra nin gafe kɔnɔ, a jateden fɔlɔ gafe walima bataki tɔgɔ kɔfɛ, o ye tilayɔrɔba ye, ani a tɔ kelen ye tilayɔrɔ fitinin ye. Misali la, “2 Timote 3: 16” ye Timote ka bataki filanan, tilayɔrɔba sabanan, tilayɔrɔ fitinin tan ni wɔɔrɔnan de ye.

I bɛna dege joona ni Bibulu ye n’i b’a ɲini ka Bibulu tɛmɛsira minnu kofɔlen bɛ nin gafe kɔnɔ ka olu ta. Wa, mun na i tɛ i labɛn walisa ka Bibulu kalan don o don? N’i bɛ tilayɔrɔba fila walima saba kalan don o don, i bɛna se ka Bibulu kalan daminɛ fo k’a laban san kelen kɔnɔ.