Jehová Diosan Qhanañchirinakapa—¿khitinakasa ukat kunsa yatichapxi?

Diosan yatichäwinakapax taqinimp sum jakasiñwa yanapt'istu

BIBLIAN yatichäwinakapax janis jichha tiempo jaqinakatakix askïxaspa ukham jaqinakax amuyapxi. ¿Ukhamäpachati? Mä kutixa, Mohandas Gandhi hindú jaqimpi ukat India marka apnaqiri Lord Irwin sat jaqimpiw akham sasa parlt'apxatayna. India markampi Gran Bretaña markampix kunjamatsa jan walt'ayasiñanakapxa purapat askichapxaspa, kunjamsa jumax amuyta sasaw Lord Irwin sat chachax Gandhi chachar jiskt'atayna. Ukat Gandhi chachasti mä Biblia aptasaw Mateo 5 jalja jist'aräna ukat akham sasaw säna: “Criston Wali Uñt'at Arst'äwiparjamax markamampi markajampix sarnaqapxani ukhaxa, janiw markanakasan jan walt'äwinakapaki askichkañäniti, jan ukasti aka Uraqpachan taqi jan walt'äwinakapwa askichsnaxa” sasa.

Uka Wali Uñt'at Arst'äwixa Diosatakjam sum sarnaqañasatakiw ch'amachistu: llamp'u chuymani, khuyapayasiri, ukham suma jaqïñatakiw yanapt'istu, ukatxa kunatix chiqäki uk munapxam sarakiwa. Ukatxa janiw jaqir jiwayañakix juchäkiti, jan uksti jaqi masir uñisiñas jucharakiwa; janiw wachuq juchakix jan walïkiti, jan wali amuyunakas jucharakiwa sasaw yatichi. Maysa tuqitxa, aliqataki divorciasiñax janiw walïkit sasaw yaticharaki, kuna laykutix familiarux tukjiwa ukat wawanakarus t'aqhisiyarakiwa. Akham sarakistuwa: ‘Uñisirinakamarus munapxam, pisinkirinakarux yanapt'apxam, jan jaqi masirux juchañchapxamti, kunjamtix mayninakan uñjatäñ munapktaxa ukham yaqhanakar uñjapxarakim’ sasa. Taqinis uka iwxt'anakarjam sarnaqsna ukhaxa wali askipunïspawa. Mä markantï uka iwxt'anakar phuqasispa ukhaxa, taqi kunas wali sumäspawa.

Uka tuqitxa, Jehová Diosan Qhanañchirinakapax Biblian kamachinakaparjamaw sarnaqapxi. Kunjamtï Diosan Arupax yatichkixa ukarjamaw jaqichasiñsa uñjapxi; wawanaksa sum yatichapxi, ukat familian mayacht'at jakasiñ tuqitsa amuyapxaraki. Ukham mayacht'at suma familianakax kawkintï jakapki uka chiqansa wal yanapt'apxi, ukat markpachatakis wali askirakiwa. Ukampis kunapachatï familianakax aynacht'xapxi, jan ukax q'añu luräwinakax familianakan utjxi ukhaxa, wali ch'amani jach'a markanakas aynacht'apxarakiwa. Ukhamasti, Jehová Diosan Qhanañchirinakapax walja jaqinakaru, jan ukax walja familianakar Diosan kamachinakaparjam sarnaqañ yanapt'apxaspa ukhaxa, janiw lunthatasiñas jiwayasiñasa, jan ukax q'añu luräwinakas añcha utjkaspati.

Ukat mä jan walt'äwiw taqi markanakan utjaraki, ukasti yaqha kasta jañchininakar uñisiñawa. Uka tuqitxa apóstol Pedrox akham sänwa: “Chiqpachanwa amuyta, Diosatakix taqi casta jaqis mayakïtapa. Jupasti kuna cast jaqirus katuqakiwa, khitinakatix jupar axsarki, ukhamarak aski lurapki taqi ukanakarusa” sasa. Ukxaruxa, apóstol Pablox akham sarakïnwa: “Jupankxasinxa janiw utjkxiti judiosa, griegosa, esclavosa, libresa, chachasa ni warmisa. Cristo Jesusar mayachatäxasinsti taqi jumanakax mayakïxapxtawa” sasa (Hechos 10: 34, 35; Gálatas 3: 28). Ukhamwa Jehová Diosan Qhanañchirinakapax amuyapxi. Sañäni, Uraqpachan kunjamas yatiyasiski uk uñjañataki utjki uka utansa sucursalanakansa kunayman jaqinakaw irnaqapxi, ukat tamanakansa taqi kasta jaqinakaw utjaraki, ukampis mä familiakïpkaspas ukhamaw sum apasipxi.

Africanxa yaqhip markanakanxa ch'axwapxakipuniwa. Ukat Jehová Diosan Qhanañchirinakapax uka markanakanwa jach'a tantachäwinak lurapxaraki, ukampis jupanakax janiw ch'axwapkiti, jan ukasti wali mayacht'ataw manq't'asipxi, mä utaruki qurpachasipxi. Ukhamaw Diosar mä wawaki yupaychapxi, uk uñjasax autoridadanakax wal muspharapxi. Amtañäni, mä jach'a tantachäwiw Nueva York markanxa apasïna, ukarux yaqha markanakat kunaw sarapxäna, niya pä pataka phisqa tunka waranqaniw tantachasipxäna, uka jach'a tantachäwi uñjasaxa kunjamas chiqpach cristianonakax mayacht'ata jakasipxaspa uka tuqitwa mä periodiconxa parli (Ámsterdam News, agosto 2, 1958 New York City).

Akham uka periodiconx parli: “Taqi chiqanwa ch'iyar jañchininakasa, janq'u jañchininakasa, inti jalsu tuqinkirinakasa, pisinkirinakasa, qamirinakasa uñjasïna, ukatxa wali kusisitaw purapat wali sum parlt'asipxäna. [...] 120 jach'a markanakat jutat Jehová Diosan Qhanañchirinakapaxa, wali mayacht'ataw Diosar suman yupaychawayapxi, ukat uk lurañax janiw ch'amäkataynati, ukwa Estados Unidos markan jakasir jaqinakarux uñacht'ayawayapxi. [...] Ukhamasti jaqinakax wali sumaw mayacht'ata irnaqapxaspa jan ukax jakasipxaspa, ukwa uka jach'a tantachäwix uñacht'ayi” sasa.

Jichhürunakanxa, Diosan kamachinakapax janiw askïxiti sasaw jaqinakax sapxi, ukampis ¿kuna yaqha kamachinakas jaqinakar yanapt'aspa? Amuyt'añäni, mä markan taqini Diosan kamachinakaparjam sarnaqapxaspa ukhaxa, taqi kunas wali sumäspawa. Ukatxa, uka yatichäwinakaw ‘taqi markanakata, kunayman janchini, ukhamarak taqi kasta parlani’ jaqinakarux yanapt'ani, Diosan Apnaqäwipampi apnaqata aka Uraqin jakasiñataki (Apocalipsis 7: 9, 10).