¿Kunsa Bibliax chiqpachapuni yatichi?

SAÑÄNI, mä uruxa utat wali jay sarasma, ukat qinayanakax wal apthaptanispa. Akatjamat wal alaxpachat llijullijux llij llijtanispa, q’ixu q’ixus ukhamaraki, ukatxa walpun jallux purintaspa. Ukhaxa jank’akiw kuna imantasiñsa thaqtasma. Ukat thaki jak’ana imantasiñjam mä jisk’a uta uñjasmaxa, laqakiw uka utaru t’ijkatasmaxa. ¡Walikxay aka utax utjchixa!, sasmawa.

² Jichhürunakanxa jan wali urunakanwa jakastanxa, chijir puriñ urunakanwa jakastanxa, akapachax jan walit juk’amp jan waliruw saraski. Ukampis mä suma imantasiñaw utji, ukasti wiñay t’aqhisiyir jan walinakatxa jark’aqistaspawa. ¿Kawkins ukham imantasiñax utjpacha? Bibliax Jehová Diosat akham siwa: ‘Jumätaw imantasiñajaxa, jark’aqasiñajasa, Diosajay, jumaruw taqpach chuymamp alkatsma’ sasa (Salmo 91:2).

³ Inuqiri, taqi kunxaru Munañani jach’a Jehová Diosaw imantasiñasäspaxa. ¡Wali jach’a bendicionaw ukaxa! Khiti jan walt’ayirit sipansa, kuna jan walt’ayirit sipansa jupax wali ch’amaniwa. Usuchjapkchistanisa, Diosax waliptayistaniwa. ¿Kunjamsa Jehová Diosar imantassna? Taqi chuyma juparu alkatañasawa. Ukat Bibliax akham sistuwa: “Diosan munasiñapan jakapxam” sasa (Judas 21). Ukhamawa, alaxpachankir Awkisan munasiñapan jakasiñasawa ukat mayachatäñasawa. Ukhamäni ukhaxa, Jupawa chiqpacha imantasiñasänixa. Ukampisa, ¿kunjamsa Inuqirisampi munasisa sarnaqsnaxa?

DIOSAN MUNASIÑAPATA LUP’ISAXA JUPARUX MUNASIRAKMA

⁴ Kunayman tuqitwa Jehová Diosax munasiñap uñacht’ayistu. Uka tuqita amtañäni, ukanakax Diosan munasiñapan jakasiñwa yanapistani. Biblian kuna yatichäwinakaptï aka libron yatiqktaxa ukanakat mä qhawqha amtañäni. Sañäni, kusisita jakasiñatakixa, mä suma Uraqwa Inuqirisax churistu, ukanxa manq’añanakasa umasa waliwa, ukatxa kunaymaninakwa Uraqix churistu, kunayman animalanakaw utji, suma ch’uxña lugaranakas utjarakiwa. Ukatxa, Bibliax Diosan churäwiparakiwa, ukanwa kuna sutinisa, kunjam Diosasa ukanakxa qhanañchistu. Diosax aka Uraqiruw Yuqapxa khitanitayna ukatxa jiwasanak laykuw t’aqhisiwayi ukat jiwawayi, sasaw Bibliax qhanañchi (Juan 3:16). Ukhamatwa mä suma waxt’a churawayistu, uka waxt’a utjipanwa jutïr urunakataki mä suma suyt’äwix utjistu.

⁵ Uka suma suyt’äwi utjañapatakixa, Jehová Diosaw alaxpachan mä Apnaqäwi utt’ayaraki, ukax Criston Apnaqäwipa satawa. Uka Apnaqäwix niyaw taqi t’aqhisiñanak chhaqtayani ukatsti Uraqxa kusipachaptayarakiniwa. ¡Kunja sumakïkani! ¡Ukhaw wali kusisita jakasxañänixa ukat wiñayatakiw suman jakasxarakiñäni! (Salmo 37:29.) Ukampisa, uka uru suyañkamaxa, Diosan iwxanakapaw sum jakañ yanapt’arakistani. Jehová Diosatxa yaqha suma churäwi katuqaraktanxa, ukasti jupar mayisiñawa, ukhamatwa jupampix parlastanxa. Uka churäwinakampiw Diosax munasiñapxa jumarus yaqhanakarus uñacht’ayi.

⁶ Jichhaxa, mä wakiskir jiskt’a jiskt’asiñamawa: “¿Diosax wal munasitu, jichhax kun lurañajäpachasa?” sasa. Inas yaqhipanakax “Juparux munasiñasarakiwa” sapxchispa. ¿Jumax ukhamti amuyarakta? Akïriw jilïr kamachixa sasaw Jesusax satayna: “[Jehová] Tatit Diosamaruw munäta taqi chuymamampi, taqi almamampi, taqi amuyumampiraki” sasa (Mateo 22:37). Jïsa, Jehová Diosaruxa wal munasiñamawa. Ukampisa, Diosaru taqi chuymampi, taqi almampi, taqi amuyumpi munasiñatakixa, ¿uñt’añakit wakisispa?

⁷ Diosar munasiñaxa janiw ukham uñt’añakïkiti siw Bibliaxa. Chiqasa, ukham uñt’añax walïskiwa, ukampisa ukax Diosar chiqa munasiñan qalltapakiwa. Amuyt’añataki: mä manzana munasma ukhaxa, ¿jathaki churapxiristamsti walikiw sasmati? Janiwa. Chiqasa uka jathax askiwa manzana utjañapatixa, ukampis jumax achupwa muntaxa. Kunjamtï jathax jiltasin achuqkixa, ukhamäñaparakiw Jehová Diosar uñt’añaxa. Bibliax akham yatichi: “Diosar muna[si]ñaxa mandamientonakar phuqhañawa; mandamientonakapasti janirakiw jan phuqhañjamäkiti” sasa (1 Juan 5:3). Ukhamaxa, Diosar chiqpach munasiñaxa suma achunakanïñapawa, ukasti sarnaqäwisanxa qhanäñapawa (Mateo 7:16-20).

⁸ Diosan kamachinakap ist’ktan ukat yatichäwinakaparjam sarnaqktan ukhawa Diosar munasitasxa uñacht’aytanxa. Ukax janiw ch’amäkiti, kamachinakapax janiw jan phuqañjamäkiti. Jan ukasti, kusisita sum jakasiñasatak qillqatawa (Isaías 48:17, 18). Jehová Diosampi irpayastan ukhaxa, kuntï alaxpachankir Awkisaxa jiwasanakatak lurki ukat wali yuspärataswa uñacht’aytanxa. Ukampisa juk’anikiw Diosarux yuspärapxi. Jesusax aka Uraqinkkäna ukhaxa yaqhipanakax jan yuspärasiripxänwa, jiwasax janiw ukhamañasäkiti. Mä uruxa leprampi usuntat tunka jaqinakaruw Jesusax qullatayna, ukatxa maynikiw Jesusar yuspärañatakix kutt’atayna (Lucas 17:12-17). Uka yuspärasir jaqjamäñasawa, llätunkanix janiw yuspärapkänti, janiw jupanakjamañasäkiti.

⁹ Ukhamaxa, ¿Jehová Diosan kuna kamachinakapsa ist’añasaxa? Mä qhawqha kamachinakxa aka libronwa yatiqtanxa. Ukanak amtañäni, Diosan kamachinakaparutï ist’añänixa, Jupan munasiñapan jakasiñaxa janiw ch’amäkaniti.

JUK’AMPI JEHOVÁ DIOSARU JAK’ACHASIÑÄNI

¹⁰ Jehová Diosar uñt’añax wali wakiskiriwa jupar juk’ampi jak’achasiñatakixa. Jupar uñt’añax janiw tukusiñapäkiti. Amuyt’añataki: juyphipachansa mä arumax utat jaya pampan jikxatasisma, ukatxa junt’urt’asiñatakixa ninwa phichhasisma. Ninax juk’at juk’at jiwarxaspa ukhaxa, ¿ukhamakiti uñch’ukisma? Janiwa. Ninax nakhaskakiñapatakixa phäñxa apxataskakiñamawa, jan ukax thayax jiwayiristamwa. “Diosar uñt’añaxa” phäñamp sasiwa, kunjamtï phäñaxa nin nakhaykixa, ukhamarakwa “Diosar uñt’añaxa” jupar munasiyistu (Proverbios 2:1-5).

¹¹ Jesusan arkirinakapaxa, Jehová Diosarus Aruparus munasipxapunispa uk Jesusax munäna. Jiwatat jaktasinxa, Hebreo Qillqatanakatwa, jupan phuqasiri mä qhawqha profecianakat pä arkirinakaparuxa Jesusax qhanañchäna. ¿Kunjamt’ayänsa arkirinakaparuxa? Mä juk’ampiruxa akham sapxänwa: “¿Janit qhanpacha chuymanakasax nakkistänxa thak jiwasamp chik jutaskäna, ukhamarak Qillqatanakat amuyt’ayaskistäna ukkhaxa?” sasa (Lucas 24:32).

¹² Kuntï Bibliax chiqpachapuni yatichi uk yatiqkasaxa, ¿janit juman chuymamaxa ukham kusisita ukat Diosar wali munasisa jikxataskarakïna? Ukhamäpachawa. Waljaniw ukham kusisipxiri. Jichhaxa munasiñ jiltayañaxa ch’amäspawa, thayaraspawa. Aka qhipa urunakanxa “waljanin munasiñapaw thayarani” sataynawa Jesusaxa, janiwa jiwasaxa ukhamäñ munktanti (Mateo 24:12, MT). ¿Kunjamatsa Jehová Diosaru munasiñamasa ukat Biblian chiqa yatichäwinakaparu munasiñamasa jan thayarkaspa?

¹³ Jehová Diosaru ukat Jesucristompiru juk’ampi uñt’askakiñamawa (Juan 17:3). Kuntï Diosan Arupan liyt’kta uka tuqitxa wali lup’iñamawa, ukatxa akham jiskt’asiñamawa: “¿Akaxa kunsa Jehová Diosxata yatichitu? ¿Diosaru taqi chuymampi, taqi almampi, taqi amuyumpi munasiñajaruti yanappachïtu?” sasa (1 Timoteo 4:15). Ukham lup’ïtaxa, Jehová Diosar munasiñamaxa janipuniw thayarkaniti.

¹⁴ Jehová Diosar munasiñasa jan thayarañapatakixa, Diosar mayisiñasapuniwa (1 Tesalonicenses 5:17). Kunjamtï 17 jaljan yatiqktanxa mayisiñaxa Diosan mä jach’a churäwipawa. Kunapachatï munat masinakasampi taqi chuyma parlt’asktan ukhaxa, jupanakarux juk’ampwa jak’achastanxa. Ukhamarakiwa, Jehová Diosar mayisipuniñänixa juparu munasiñasax janiw thayarkaniti. Janiw inamay arunakampi mayisiñasäkiti; janiw kutin kutin pachpa arunakaki jan amuyt’asisa sañasäkarakiti. Kunjamtï mä wawax awkiparu parlxaykixa, ukhamwa Jehová Diosarux arxayañasarakixa. Wali respetompi, chuymsa jupatak jist’arasawa taqi chuyma juparu mayisiñasaxa (Salmo 62:8). Ukhamawa, Diosar yupaychañatakixa wali wakisiriwa Bibliata sapaki yatiqaña ukat taqi chuyma mayisiñasaraki. Ukhamatwa Diosan munasiñapan jakasiñax jan ch’amäkaniti.

DIOSAR YUPAYCHAÑAXA WAL KUSISIYISTU

¹⁵ Bibliat yatiqasasa, Diosar mayisisasa Juparuw yupaychtanxa, ukampisa sapakiw uk lurtanxa. Yaqhanakamp chikäsktan ukhaxa kun lurañasasa uka tuqita jichhax parlt’arakiñäni: ukhax iyawsäwisat yaqhanakaru yatiyañawa. ¿Biblian yatichäwinakapat parlirïtati? Ukax Jehová Diosan jach’a churäwipawa, jupaw uka lurañxa munasiñapata churistu (Lucas 1:74). Kunapachatï Jehová Diosat yatiqatanakasa parlktan ukhaxa, kuntï chiqa cristianonakjamax mä luraña katuqktanxa uk lurasktanxa: ukaxa Diosan Apnaqäwipata suma yatiyäwinaka yatiyañawa (Mateo 24:14; 28:19, 20).

¹⁶ Pablotakixa yatiyañax wali askïnwa, ukatwa Diosan jach’a churäwipaw sänxa (2 Corintios 4:7). Jehová Diosampita amtanakapampita yatiyañaxa wali askiwa, janipuniw ukham yaqha irnaqañax utjkaspati. Mä tuqitxa suma Uywiriru luqtañawa, maysa tuqitsti, wali aski suma churäwinaka katuqäta. Yatiyasinxa, chiqa chuymani jaqinakaruwa, alaxpachankir Awkisaru jak’achasiña, ukat wiñay jakañaru irpir thakiru sarxatañwa yanapt’tanxa. ¿Kuna yaqha lurañas ukham kusisiyistaspa? Ukampisa, Jehová Diosampita Arupampita yatiytan ukhaxa, iyawsäwisampi Diosar munasiñasampiwa jilxattaskixa. Ukat uka luratanakasax wali askiw Diosatakixa (Hebreos 6:10). Ukhamtï lurañänixa Diosan munasiñapan jakasiñwa yanapistani (1 Corintios 15:58).

¹⁷ Diosan Apnaqäwipatxa jank’akiw jaqinakar yatiyapxañasa, janipuniw uk armañasäkiti. Bibliax siwa: Jehová “Tatitun arunakap parlam; wakiski ukkhasa, jan wakiski ukkhas parlapunim” sasa (2 Timoteo 4:2). ¿Kunatsa jank’aki yatipxañapa? Diosan Arupax akham siwa: “Jak’ankiwa [Jehová] Tatitun khä jach’a urupaxa. ¡Jak’ankiwa uka urux, jank’akiw purinirakini!” sasa, ukatwa jank’aki yatipxañapaxa (Sofonías 1:14). Ukhamawa, Diosax akapach t’unjkani uka uruxa wali jak’ankxiwa. ¡Jaqinakax yatipxañapawa! Jichhaw Jehová Diosar jach’a Apnaqirirjama ist’apxañapaxa, kunattix uka urux ‘horasaparuw’ purinini (Habacuc 2:3).

¹⁸ Chiqa cristianonakamp chika taqinin uñjkatawa Jehová Diosarux yupaychañasa ukwa jupax muni. Ukatwa Arupaxa akham sixa: “Uñjasipxarakiñäni purapata, wiytasiñasataki munasiñaru aski luräwinakampiru; tantachasiwisxa jan jaytanukusa, kamisatï yaqhipanakax ukaru yatitäpxi, ukat sipana purapat ch’amañcht’asisa, ukat juk’ampi, khä uru jak’achasisinkiri uñjasina” (Hebreos 10:24, 25, MT). Kunapachatï tantachäwinakaru cristiano jilat kullakanakampi tantachasiri sarktan ukhawa alaxpachankiri wali munat Awkisaru yupaychtanxa, ukax wali askiwa. Ukatxa jiwaskamasa purapatwa waytt’astanxa chuymacht’asiraktansa.

¹⁹ Jehová Diosan luqtirinakapampi tantachastan ukhaxa, jilat kullakanakampiw taman sum uñt’astanxa. Janiw pantjasitanakapa thaqhañasäkiti jan ukasti suma luräwinakapa uñjañasawa, kunjamtï Jehová Diosax uñjki ukhama. Janiw aski jaqïktanti. Amtapunïtawa: taqiniw pantjasirïtanxa, ukat janiw ajay tuqitxa taqinis mayaki jiltktanti (Colosenses 3:13). Jehová Diosaru taqi chuyma munasirinakampiw chikachasïta, ukhamatwa ajay tuqit jiltatamxa amuyasïta. Taman jilat kullakanakamp chika Diosaru yupaychätaxa, Diosan munasiñapan jakasiñax janiw jumatakix ch’amäkaniti. Jehová Diosaru yupaychirinakaxa jan ukax munasiñapan jakasirinakaxa kunsa katuqapxani, uk jichhax uñjañäni.

“CHIQPACH JAKAÑÄKI” UK KATUQAÑATAKI CH’AMACHASIÑAMAWA

²⁰ Jehová Diosaru taqi chuyma yupaychirinakaxa jakäw katuqapxani, ¿kuna kasta jakäwsa katuqapxani? Chiqasa, jila partix jakasktanwa sapxaspawa, manq’asktanwa, samaqisktanwa ukat umt’asktanwa sasa. Wali kusisitäktan ukhasa akham saksnawa: “¡Akapï jakañaxa!” sasa. Ukampisa, janiw khitisa chiqpach jakañäki uk jakkiti siw Bibliaxa.

²¹ Bibliax taqinirus siwa: ‘Wiñay jakaña katuqapxañamataki’ ch’amachasipxam sasa, jan ukax kunjamtï, Machaka Testamento Bibliax siskixa: ‘Chiqpach jakañäki uka katthapipxañamataki’ ch’amachasipxam sasa (1 Timoteo 6:19). ‘Chiqpach jakaña’ siski uka aruxa, kunjamtï jutïr urunakan jakaskañänixa uk sañ muni. Kunapachatï jan juchanïxañäni ukhawa ukham jakasxañäni, kunjamtï Diosax qallta amtapan munkäna ukhama. Kunürutï kusipach uraqinkxañänixa janiw usuntxañäniti, suman jakasxañäni, wali kusisitaw sarnaqasiñäni, ukhaw ‘chiqpach jakasxañänixa’ mä arunxa wiñayaw jakasxañäni (1 Timoteo 6:12). Chiqasa, suma jutïr urunakäniwa, ¿ukax kunjamas jumatakixa?

²² ¿Kunjamsa maynix ‘chiqpach jakañäki’ uk katuqaspa? Apóstol Pabloxa janïra aka arunak arskasaxa, cristianonakarux akham sänwa: ‘Aski lurapxam, suma luräwinakata qamirïpxam’ sasa (1 Timoteo 6:18, MT). Ukhamax Bibliat yatiqatasarjam sarnaqañasawa. Ukampisa, ¿suma luräwinakampiwa ‘chiqpach jakañxa’ katuqsna sañti Pablox munpachäna? Janiwa. ‘Diosaw ina ch’usat qhispiyasistu’ ukatwa uka suma suyt’äwinïtanxa, mä arunxa Diosan khuyapayasiñapawa (Romanos 5:15). Ukatxa, Jehová Diosax wal uka bendición churañ muni taqi chuyma yupaychirinakaparuxa. Jupax kusisita, sumana ‘chiqpach jakasiñamwa’ muni. Ukhamwa jakasipxani Diosan munasiñapan jakasirinakaxa.

²³ “¿Bibliarjamati Diosaru yupaychasktxa?” sasawa sapa maynix jiskt’asiñasa. Sapürutjamtix ukhamaw sañaru tirañänixa, walik lurasktanxa. Jehová Diosawa imantasiñasaxa janiw ukat payachasiñasäkiti. Aka ñanqhapachan jan wali qhipa urunakapanxa, Diosaw markaparux arxataskani. Ukat mä machaq suma uraq churistani, ukax wali jak’ankxiwa. ¡Kunja sumakïkani! ¡Aka qhipa urunakan sum amtatasatxa wal kusisiñäni! Jichhatï suma amtanaka amtätaxa, wiñay wiñayatakiw ‘chiqpach jakañäki ukxa katuqäta’, ukham jakasiñaswa Jehová Diosax nayratpach munäna.

---