?É yó sɛ naan y’a wun Ɲanmiɛn sulɛ kpafuɛ’n?

1. Klistfuɛ kpa’m be asɔnun’n i kunngba cɛ yɛ Zezi kpɛli i ba ɔ. I sɔ’n ti’n, ɔ fata kɛ andɛ Zoova i sufuɛ’m be yo wunnɛn kun (Zan 4:23, 24; Efɛzfuɛ Mun 4:4, 5). Biblu’n yiyi nun kle e kɛ be nga be o nguan atin’n su’n, b’a sɔnman.—Matie 7:13, 14.

2. Biblu’n seli kɛ, kɛ akoto’m be ko wie wu’n, like klefuɛ nga be diman nanwlɛ’n, ɔ nin ayeliɛ nga be timan Klistfuɛ ayeliɛ’n, bé wá wlú Klistfuɛ’m be asɔnun nun blɛblɛblɛ. Sran wie’m bé wá kán ndɛ nga ɔ timɛn i nuan su’n, bé fá láka Klistfuɛ mun kɛ be su be su naan be yaci Klist lɛ (Matie 7:15, 21-23; Sa Nga Be Yoli’n 20:29, 30). I sɔ’n ti yɛ asɔnunfuɛ fanunfanun nga be tɔn be wun suɛn kɛ be ti Klistfuɛ’n b’a sɔn’n niɔn. ?Sɛ yɛ é yó naan y’a wun Klistfuɛ kpa’m be wlɛ ɔ?

3. Klistfuɛ kpa’m be nzɔliɛ dan kpa’n yɛle be wiengu klolɛ’n (Zan 13:34, 35). B’a suanman be wun kpakpa yolɛ nvle uflɛfuɛ su annzɛ sran nga be kplo’n timan kɛ be liɛ’n sa’n, be su. Be kleman be kɛ be kpɔ nvle uflɛ su sran mun (Sa Nga Be Yoli’n 10:34, 35). Be diman alɛ. Klistfuɛ kpa’m be nin be wiengu be tran kɛ sran nin i niaan sa.—1 Zan 4:20, 21.

Klistfuɛ kpa’m be klo be wiengu, be ɲin yi Biblu’n kpa, kpɔkun be bo Ɲanmiɛn i Sielɛ Blɛ’n jasin’n.

4. Ɲanmiɛn sulɛ wafa kpafuɛ’n i nzɔliɛ kun ekun yɛle kɛ i nunfuɛ’m be ɲin yi Biblu’n kpa. Be bu Biblu’n kɛ Ɲanmiɛn Kpli i nuan’n nun ndɛ sa, kpɔkun be fɛ i ndɛ nga ɔ kan’n su (Zan 17:17; 2 Timote 3:16, 17). Be liɛ’n, Ɲanmiɛn ndɛ’n ti be cinnjin tra klɔ sran’m be angunndan nin be nzuɛn mun (Matie 15:1-3, 7-9). Be nguan cɛn kwlaa nun’n, be mian be ɲin be nanti ndɛ nga Biblu’n kan’n su. Ndɛ nga ɔ fite be nuan’n, i su yɛ be nanti ɔ.—Tit 1:15, 16.

5. Ɔ fata kɛ Ɲanmiɛn sulɛ wafa kpafuɛ’n bo Ɲanmiɛn Kpli i dunman fɛ wie (Matie 6:9). Zezi fa Ɲanmiɛn Kpli i dunman Zoova kleli sran mun. I sɔ’n ti, ɔ fata kɛ Klistfuɛ kpa’m be yo sɔ wie (Zan 17:6, 26; Rɔmfuɛ Mun 10:13, 14, NW). ?Amun tranwlɛ lɔ’n, sran mennin mun yɛ be kle be wiengu Ɲanmiɛn Kpli i dunman’n niɔn?

6. Ɔ fata kɛ Klistfuɛ kpa’m be bo Ɲanmiɛn i Sielɛ Blɛ’n jasin fɛ’n. I sɔ yɛ Zezi yoli ɔ. W’a yaciman Ɲanmiɛn Sielɛ Blɛ’n i Ndɛ kanlɛ le (Lik 8:1). Ɔ se i sɔnnzɔnfuɛ’m be kɛ be bo i sɔ jasin fɛ’n mɛn wunmuan’n nun (Matie 24:14; 28:19, 20). Klistfuɛ’m be lafi su kɛ saan Ɲanmiɛn Sielɛ Blɛ’n kunngba cɛ yɛ ɔ kwla man anuannzɛ nin alaje kpa asiɛ’n su ɔ.—Jue Mun 146:3-5.

7. Ɔ fataman kɛ Zezi i sɔnnzɔnfuɛ’m be yo mɛn nunfuɛ (Zan 17:16). Politiki nin mɛn nun sran dan yolɛ’n i kplilɛ nga be kpli’n, be nunmɛn i sɔ ninnge be nun wie. Be wla mɛn nun nzuɛn fiɛnfiɛn, nin ayeliɛ, nin angunndan tɛtɛ’m be ase (Zak 1:27; 4:4). ?Amun tranwlɛ lɔ’n, amun si Ɲanmiɛn sulɛ wafa kun mɔ be kwla se kɛ Klistfuɛ kpa’m be nzɔliɛ’n o i nun’n?

Copyright © 2008 Watch Tower Bible and Tract Society of Pennsylvania. All rights reserved.