?Wan yɛle Bae’n?

1. Bae’n yɛ ɔ ti sa tɛ kwlaa i bo’n niɔn. Sa sɔ’m be nun kun yɛle sran suɛn tɔnlɛ’n. Yɛ “Satan” i bo’n yɛle kpɔfuɛ annzɛ ɲrun tanndanfuɛ. Dunman nɲɔn ngalɛ’n ti Ɲanmiɛn Kpli i kpɔfuɛ dan kpa’n i liɛ. I klikli nun’n, ɔ ti anzi kpa kun, ɔ tran Ɲanmiɛn i wun ɲanmiɛn su lɔ. Sanngɛ ɔ́ jú i ɲrun’n, ɔ wa tuli i wun, kpɔkun ɔ kunndɛli kɛ be koto i bo be mɛnmɛn i, sanngɛ nn Ɲanmiɛn Kpli kunngba cɛ yɛ ɔ fata kɛ be koto i bo be mɛnmɛn i ɔ.—Matie 4:8-10.

2. Anzi Satan sɔ’n fali wuo kun, yɛ ɔ nin Ɛvu be ijɔli ɔ. Ɔ buali ato kleli Ɛvu, kpɔkun Ɛvu yoli ɲin kekle Ɲanmiɛn Kpli su. Ɔ maan Satan fɛli i ɲin cili Ɲanmiɛn i “famiɛn dilɛ’n,” annzɛ Ɲanmiɛn i tranwlɛ nga like fi nunmɛn i sin’n. Yɛle kɛ Satan waan Ɲanmiɛn siman sran sie, naan ɔ niɛnmɛn i mma’m be lika kpa. Satan se kɛ klɔ sran fi su kwlá yoman ndɛnmanfuɛ Ɲanmiɛn ɲrun. I ayeliɛ ngalɛ’n ti yɛ ɔ kacili Ɲanmiɛn Kpli i kpɔfuɛ’n niɔn. I sɔ’n ti yɛ be flɛ i Bae annzɛ mmusu’m be si Satan’n niɔn.—Bo Bolɛ 3:1-5; Zɔb 1:8-11; Sa Nglo Yilɛ 12: 9.

3. Satan kunndɛ kɛ ɔ́ fá gblɛ kpɛlɛ’n su sran’m be bo naan be koto i bo be mɛnmɛn i (2 Korɛntfuɛ Mun 11:3, 14). Ninnge’m be nun kun nga ɔ fa laka sran mun’n, yɛle Ɲanmiɛn sulɛ wafa nga ɔ ti tɛ’n. Sɛ Ɲanmiɛn sulɛ wafa kun nun’n, be kle Ɲanmiɛn i su like nga ɔ timan nanwlɛ’n, nn Satan i klun sa yɛ be yo ɔ (Zan 8:44). Be nga be kɔ Ɲanmiɛn sulɛ wafa nga ɔ ti tɛ’n i nun’n, kannzɛ bɔɔ be bu i kɛ Ɲanmiɛn Kpli yɛ be su i’n, sanngɛ Satan yɛ be su i ɔ. I yɛ ɔ ti ‘mɛn nga i min’n niɔn.’—2 Korɛntfuɛ Mun 4:4.

Ɲanmiɛn sulɛ wafa nga ɔ ti tɛ’n nin bae dilɛ’n nin be nvle nun sran ngunmin klolɛ’n, i sɔ’n laka sran mun.

4. Bae dilɛ’n yɛ Satan fa tran sran’m be su ɔ. Sran wie’m be flɛ mmusu mun be fa sasa be wun, annzɛ be fa yo be wiengu’m be abɔlɛ, annzɛ be fa yi wunnzue annzɛ atrɛ mun. Satan klunwifuɛ’n i fanngan nun yɛ be kwla yo ninnge ngalɛ mun ɔn. Sɛ e kunndɛ kɛ Ɲanmiɛn i klun jɔ e wun’n, ɔ fataman kɛ e sa kan bae dilɛ’n kaan sa.—Mmla’n 18:10-12; Sa Nga Be Yoli’n 19:18, 19.

5. Satan laka sran mun naan be tu be wun be nvle nunfuɛ’m be ti, annzɛ be koto politiki anuannzɛ’m be bo be manman be. Wie’m be bu i kɛ be nvle nunfuɛ annzɛ be akpasua sufuɛ’m be kpa tra be nga mun. Sanngɛ ngalɛ’n ti ato (Sa Nga Be Yoli’n 10:34, 35). Wie’m be lafi politiki anuannzɛ’m be su naan be yo be ye. I sɔ mɔ be lafi su’n ti, Ɲanmiɛn Sielɛ Blɛ m’ɔ ti like kunngba nga ɔ kwla yo sran ye’n, be kpalo i.—Daniɛl 2:44.

Amun suan Zoova su ninnge titi naan amun a kwla jran kekle Satan ɲrun.

6. Like nga Satan fa laka sran mun wie’n, yɛle konvi tɛtɛ mun. Kɛ Zoova si kɛ ayeliɛ tɛtɛ’m be kwla wla e ɲrɛnnɛn nun’n ti’n, ɔ se e kɛ e wla be ase (Galasifuɛ Mun 6:7, 8). Sran wie’m be kwla se amun kɛ amun nin be yo ninnge tɛtɛ sɔ mun wie. Sanngɛ nanwlɛ, nán an wla fi su kɛ Satan bɔbɔ yɛ ɔ klo kɛ amun yo i sɔ ninnge’n niɔn.—1 Korɛntfuɛ Mun 6:9, 10; 15:33.

7. Mmusu’m be si Satan mɔ yɛle Bae’n, ɔ kwla fa yalɛ klelɛ annzɛ be ɲrun tanndanlɛ’n yo naan amun kaci amun sin be si Zoova. Atrɛkpa Biblu’n nun ninnge mɔ amun suan’n ti, amun awlɛn su sran wie kwla fa amun wun ya kpa. Wie’m be kwla yo amun finfin. ?Sanngɛ yoo, wan yɛ ɔ mannin amun nguan ɔn? Satan wan ɔ́ wlánwlán amun naan amun yaci Zoova su ninnge suanlɛ. Nán amun lo amun wun be mɛn i (Matie 10:34-39; 1 Piɛr 5:8, 9)! Sɛ amun jran kekle Bae i ɲrun’n, ɔ́ jɔ́ Zoova klun dan, maan bé wún kɛ amun jrannin Ɲanmiɛn i famiɛn dilɛ’n i sin.—Nyanndra Mun 27:11.

Copyright © 2008 Watch Tower Bible and Tract Society of Pennsylvania. All rights reserved.