?Wan yɛle Zezi Klist?

1. Ka naan Zezi w’a ba asiɛ’n su wa’n, ɔ ti aolia nun sran ɲanmiɛn su lɔ. Kɛ m’ɔ ti Ɲanmiɛn Kpli sa nuan like klikli’n nga ɔ yili’n ti, be flɛ i Ɲanmiɛn i “Wa kpɛn’n.” (Kolɔsfuɛ Mun 1:15) Sran kunngba lekeleke nga ɔ ti Ɲanmiɛn ngunmin i sa nuan like’n, yɛle Zezi. Ka naan w’a ba kɛ klɔ sran sa’n, ɔ ti kɛ Zoova sa nun sran mɔ “i sa o junman’n su” sa, i yɛ Ɲanmiɛn maan ɔ yili ɲanmiɛn su lɔ nin asiɛ’n su wa ninnge kwlaa ɔ (Nyanndra Mun 8:22-31; Kolɔsfuɛ Mun 1:16, 17). Ɔ ti Ɲanmiɛn i nuan ijɔfuɛ danfuɛ’n. Nga ti yɛ be flɛ Zezi kɛ “Ndɛ’n” yɛ ɔ o lɛ.—Zan 1:1-3; Sa Nglo Yilɛ 19:13.

2. Ɲanmiɛn Kpli sunmannin i Wa’n asiɛ’n su wa, ɔ fali ba’n i nguan’n fa wlali Mali i ku sɛ’n nun. Zezi i si’n timan klɔ sran. I sɔ’n ti yɛ fɔ nunmɛn i nun’n niɔn. Like nsan ti yɛ Ɲanmiɛn sunmannin Zezi asiɛ’n su wa ɔ, naan: (1) Ɔ kle e Ɲanmiɛn i su nanwlɛ’n (Zan 18:37), (2) Ɔ yo sa i nuan su kpa naan e kusu e nanti i ajalɛ’n su (1 Piɛr 2:21) kpɔkun (3) ɔ fɛ i nguan’n fa yi e ti tɛ, naan y’a ɲan e ti sa tɛ nin wie’m be sa nun. ?Ngue ti yɛ ɔ fata kɛ ɔ yo sɔ’n niɔn?—Matie 20:28.

3. Kɛ mɔ Adam sran kliklifuɛ’n yoli ɲin kekle Ɲanmiɛn su’n, ɔ yoli like nga Biblu’n flɛ i ‘sa tɛ’n.’ Ɔ maan Ɲanmiɛn fali wie’n boli i sannzan (Bo Bolɛ 3:17-19). Kɛ mɔ w’a kwlá yoman like nga Ɲanmiɛn kunndɛ kɛ ɔ yo’n, i ti fɔ wa trɛnnin i nun. Kpɛnngbɛn yolɛ wa bɛli i nun blɛblɛblɛ, kpɔkun yɛ ɔ wuli ɔ. Adam i sa tɛ’n sali i mma mun. I sɔ’n ti yɛ e kusu e yo kpɛnngbɛn, mɔ e tɔ kpaciɛ mɔ e wu’n niɔn. ?Wafa sɛ yɛ klɔ sran’m bé kwlá ɲán be ti ɔ?—Rɔmfuɛ Mun 3:23; 5:12.

4. Zezi ti sran kpa lele kɛ Adam sa cɛ. Sanngɛ Zezi liɛ’n, kannzɛ ɔ wunnin ɲrɛnnɛn o, sanngɛ i ɲin’n yili Ɲanmiɛn kpa. Ɔ maan ɔ kwla fali i nguan’n nga fɔ nunman nun’n fa tuali Adam i sa tɛ’n i ti kalɛ. I sɔ’n yɛ Biblu’n flɛ i ‘be wun kpɔlɛ’n niɔn.’ Siɛn’n, Adam i mma’m be kwla ɲan be ti wie’n i sa nun. Be kwlaa nga be fa be wla’n guɛ i Zezi su’n, be kwla yaci be sa tɛ’n cɛ be, naan be ɲan anannganman nguan.—1 Timote 2:5, 6; Zan 3:16; Rɔmfuɛ Mun 5:18, 19.

I nun mɔ Zezi o asiɛ’n su wa’n, ɔ kleli ninnge, ɔ yoli abonuan sa mun, kpɔkun e ti’n, ɔ fɛli i nguan’n bɔbɔ mannin.

5. I nun mɔ Zezi o asiɛ’n su wa’n, ɔ yoli tukpacifuɛ’m be juejue, ɔ mannin be nga awe kun be’n be aliɛ, kpɔkun ɔ jrannin aunmuan nga ɔ kpɛ kekle kpa’n. Ɔ cɛnnin sran nga be wuli’n bɔbɔ. ?Ngue ti yɛ ɔ yoli abonuan sa sɔ mun’n niɔn? (1) Ɔ si sran nga be wun ɲrɛnnɛn’n be aunnvuɛ kpɔkun ɔ klo kɛ ɔ́ úka be. (2) I abonuan sa sɔ’m be kle e kɛ ɔ ti Ɲanmiɛn i Wa’n sakpa. (3) Be kle e like nga kɛ ɔ́ wá dí asiɛ wunmuan’n su Famiɛn’n, ɔ́ wá yó mán aɲinyiɛfuɛ mun’n.—Matie 14:14; Mark 2:10-12; Zan 5:28, 29.

6. Zezi wuli, sanngɛ Ɲanmiɛn cɛnnin i. Kɛ Ɲanmiɛn cɛnnin i sɔ’n, ɔ kacili aolia nun sran ekun, kpɔkun ɔ sɛli i sin ɲanmiɛn su lɔ (1 Pier 3:18). Kɛ ɔ fin lɛ’n, Ɲanmiɛn fali Famiɛn dilɛ’n wlali Zezi i sa nun. Ɔ ka kaan, Zezi wá núnnún klunwi’n nin ɲrɛnnɛn’n asiɛ’n su.—Jue Mun 37:9-11; Nyanndra Mun 2:21, 22.

Copyright © 2010 Watch Tower Bible and Tract Society of Pennsylvania. All rights reserved.