?Ngue like yɛ Biblu’n kle i sakpasakpa ɔ?

SƐ E kanngan zronali wie nun annzɛ e nian televiziɔn annzɛ e tie aladio nun ndɛ’n, sran kunlɛ, nin alɛ, ɔ nin kakawlonga sa mun, be ndɛ yɛ be kan ɔn. Amun bu amun bɔbɔ amun su sa’m be su angunndan be nian. Atrɛkpa’n, amun awlɛn su sran wie kwla tɔ tukpaciɛ annzɛ ɔ kwla wu. I sɔ’n kwla bo amun wla. Ɔ maan, angunndan kunngba nga Zɔbu m’ɔ ti sran kpa’n ɔ buli’n, amun kwla bu i wie. I waan: ‘Ɲrɛnnɛn ng’ɔ o min su’n, be flɛmɛn i ɲrɛnnɛn.’—Zɔb 10:15.

Maan amun usa amun wun kɛ:

• ?Ninnge sɔ mun yɛ Ɲanmiɛn waan ɔ́ yó fá mán min ɔ nin sran’m be onga mun ɔn?
• ?Ninfan yɛ ń ɲán ukalɛ naan m’an wun sa nga be o min su’n, be trawlɛ ɔ?
• ?Sran’m bé kwlá dí fɔundi asiɛ’n su wa le?

Biblu’n tɛ kosan sɔ’m be su klanman.

BIBLU’N KLE KƐ NINNGE NGALƐ MUN YƐ ƝANMIƐN WAAN Ɔ́ YÓ BE ASIƐ’N SU WA Ɔ.

‘Ɔ́ núnnún be ɲinmuɛn’n kwlaa, wie’n su tranman lɛ kun. Be su yoman sɛ kun, be su sunman kun, be su wunman ɲrɛnnɛn kun, afin laa ninnge sɔ’m be su tranman lɛ kun.’—Sa Nglo Yilɛ 21:4.

‘Cɛcɛwafuɛ’m bé tú kpɛ́n kɛ flete mun sa.’—Ezai 35:6.

‘Aɲinsifuɛ’m bé wún ase.’—Ezai 35:5.

‘Be kwlaa nga be o ndia nun’n, bé fín ndia’n nun fíte.’—Zan 5:28, 29.

‘Sran wie fi su seman kɛ: “N kpinndinman.”’—Ezai 33:24.

Maan ble’n ɔ su lele ɔ bu mɛn’n nun.’—Jue Mun 72:16.

AMUN ƝAN LIKE NGA BIBLU’N KLE’N I SU MMLUSUƐ

Nán amun kpalo ninnge nga amun wunnin be icra lɛ’n kɛ lafilɛ nun ndɛ ngbɛn wie sa. Ɲanmiɛn tali nda kɛ ɔ́ yó ninnge sɔ mun, kpɔkun Biblu’n yiyi wafa nga Ɲanmiɛn yó be’n, i nun.

Sanngɛ like nga Biblu’n yo’n, ɔ tra ngalɛ’n. Biblu’n yɛ ɔ kwla uka amun naan kɛ é sé yɛ bɔbɔ’n amun a di mɛn’n i kpafuɛ’n niɔn. Ninnge nga amun koko be su’n, ɔ nin nga be sanngan amun angunndan’n, amun e bu be su angunndan kan e nian. Ɔ kwla yo sika ndɛ, annzɛ awlo ndɛ, annzɛ kusu aunkpinndiɛ ndɛ, annzɛ amun awlɛn su sran kun mɔ w’a wu’n i ndɛ. Biblu’n kwla uka amun naan amun a wun sa nga be ju amun su andɛ’n be trawlɛ. Kpɔkun, wafa nga ɔ tɛ kosan kɛ nga bé bá yɛ sa’n be su’n, ɔ kwla cici amun wla:

• ?Ngue ti yɛ e wun ɲrɛnnɛn ɔn?
• ?Wafa sɛ yɛ e kwla wun sa nga be ju e su’n be trawlɛ ɔ?
• ?Wafa sɛ yɛ e awlobo tranlɛ’n kwla yo fɛ tra laa liɛ’n niɔn?
• ?Be wu be o lɔ?
• ?E awlɛn su sran nga be wuli’n, é kwlá wún be ekun?
• ?É yó sɛ naan y’a lafi su kpa kɛ Ɲanmiɛn wá yó ninnge nga ɔ tali nda kɛ ɔ́ yó be’n?

Kɛ mɔ amun su kanngan fluwa nga nun’n ti’n, e si kɛ amun kunndɛ kɛ amún sí like nga Biblu’n kle’n. Fluwa nga, ɔ́ wá úka amun. Amun sie i nzɔliɛ kɛ ndɛ kpɔlɛ’m be su kosan’m be o fluwa’n i bue’m be ngua lɛ. Zoova i Lalofuɛ’m be Biblu’n nun like klelɛ nun’n, be usa sran’m be kosan kpɔkun sran’m be tɛ su. Sran ko ju akpinngbin kpanngban kpa be kloli i sɔ’n. E lafi su kɛ amun kusu amún wá kló i wie. Kɛ mɔ amun su suan like nga Biblu’n kle i sakpasakpa’n ti’n, maan Ɲanmiɛn yo maan amun wun blibli amun naan amun di su aklunjuɛ!

MAAN AMUN SI AMUN BIBLU’N KPA

BIBLU’N nun fluwa kanngan’m be ti 66. Kɛ ɔ ko yo naan be nun like kunndɛlɛ’n w’a yo pɔpɔ ti’n, be le ndɛ tre mun nin ndɛ mma mun. Kɛ amun wun Biblu’n nun ndɛ mma wie Biblu’n i akua kun nun’n, nimielo klikli nga ɔ su Biblu’n nun fluwa’n i flɛlɛ’n su’n, ɔ ti ndɛ tre nga be kɛn i ndɛ’n i liɛ. Kpɔkun nimielo nga ɔ su kliklifuɛ’n i su’n, ɔ ti ndɛ mma’n i liɛ. Yɛle kɛ, sɛ be se kɛ “2 Timote 3:16” i bo’n yɛle kɛ fluwa nɲɔn su nga be klɛli Timote’n, i ndɛ tre 3, i mma 16.

Kɛ amún wá kúnndɛ Biblu’n nun ndɛ mma nga be boli be fluwa nga nun’n, amún wá sí amun Biblu’n kpa. ?Asa ekun’n, sɛ amun siesie amun wun naan amun kanngan Biblu’n nun cɛn kwlakwla’n, ɔ timan kpa? Sɛ amun kanngan ndɛ tre nsan lele nnun cɛn kwlakwla’n, amún kwlá kánngan Biblu’n i wunmuan’n nun afuɛ nuan kun nun.