Аллаһ кимдир?

1. Инсанлар чох шејләрә ибадәт едирләр. Лакин Мүгәддәс Китабда дејилир ки, јалныз бир ҺӘГИГИ Аллаһ мөвҹуддур. Ҝөјдә вә јер үзүндә олан һәр шеји О јаратмышдыр. Һәјаты бизә О бағышладығы үчүн јалныз Она ибадәт етмәлијик (1 Коринфлиләрә 8:5, 6; Вәһј 4:11).

2. Аллаһын чохлу титуллары, амма јалныз бир ады вар. Онун ады ЈЕҺОВА-дыр. Мүгәддәс Китабын тәрҹүмәләринин әксәријјәтиндә Аллаһын ады кәнар едилмиш, Рәбб вә Аллаһ титуллары илә әвәз олунмушдур. Лакин Мүгәддәс Китабын орижиналында Јеһова адына тәхминән 7 000 дәфә раст ҝәлинир! (Чыхыш 3:15; Мәзмур 8:1).

3. Јеһованын бәдәни вар, лакин бизимкиндән фәргләнир. Мүгәддәс Китаб дејир ки, «Аллаһ Руһдур» (Јәһја 4:24). Руһ — бизимкиндән үстүн олан һәјат формасыдыр. Һеч бир инсан Аллаһы һеч заман ҝөрмәмишдир. Јеһова ҝөјдә јашајыр, анҹаг һәр шеји ҝөрүр (Мәзмур 11:4, 5; Јәһја 1:18, И-93). Бәс мүгәддәс руһ нәдир? О, Аллаһ кими шәхсијјәт дејил. Мүгәддәс руһ Аллаһын фәал гүввәсидир (Мәзмур 104:30).

4. Мүгәддәс Китаб бизә Јеһованын шәхсијјәтини ашкар едир. Мә’лум олур ки, Онун ән әсас хүсусијјәтләри — мәһәббәт, әдаләт, мүдриклик вә гүввәдир (Тәснијә 32:4; Ејуб 12:13; Ишаја 40:26; 1 Јәһја 4:8). Мүгәддәс Китабда дејилир ки, О, һәм дә мәрһәмәтли, лүтфкар, бағышлајан, сәхавәтли вә сәбирлидир. Биз, итаәткар ушаглар кими, Ону тәглид етмәјә ҹан атмалыјыг (Ефеслиләрә 5:1, 2).

Аллаһ һаггында Онун јаратдыгларындан вә Мүгәддәс Китабдан өјрәнирик.

5. Аллаһа ибадәт едәркән сурәтләрә, шәкилләрә, рәмзләрә дуа вә ја ситајиш етмәлијикми? Хејр! (Чыхыш 20:4, 5). Јеһова дејир ки, биз јалныз Она ибадәт етмәлијик. О, өз иззәтини башга һеч кимлә вә ја һеч нә илә бөлүшмәјәҹәкдир. Сурәтләр бизә көмәк етмәкдә ҝүҹсүздүрләр (Мәзмур 115:4-8; Ишаја 42:8).

6. Аллаһы даһа јахшы неҹә танымаг олар? Үсуллардан бири — Онун бүтүн јаратдыгларыны нәзәрдән кечирәрәк, онларын бизә сөјләдикләри үзәриндә дәриндән дүшүнмәкдир. Аллаһын јаратдыглары, Онун бөјүк гүввәјә вә мүдриклијә саһиб олдуғуну ҝөстәрир. Јаратдығы һәр шејдә Онун мәһәббәтини ҝөрүрүк (Мәзмур 19:1-6; Ромалылара 1:20). Аллаһы танымағын икинҹи үсулу — Мүгәддәс Китабы өјрәнмәкдир. Бу китабын васитәсилә, О, неҹә Аллаһ олдуғу һагда даһа чох мә’лумат верир. Һәмчинин О бизә, өз нијјәти һаггында вә биздән нә истәдији барәдә билдирир (Амос 3:7; 2 Тимотејә 3:16, 17).

Copyright © 2007 Watch Tower Bible and Tract Society of Pennsylvania. All rights reserved.