Cuwa ko Kahmekan no Kawas a Pihakelongan ato Kananaman Lisin

1. Kihcod a pihakelongan ato kananaman lisin sahtoway o tati’ihay cuwaka saan. Kawraan, ano o naitiniay i makaniway a pidoyongan kora, anoca ano misaflitay to sapakafana’ no Fangcalay Cudad, cuwako kahmekan no Kawas kora.—Matay 15:6.

2. Tatoroay Ccayay ko Tireng: O tatoroay ccayay ko tireng ci Yihofa han? Cuwa! O wama ikakarayan ci Yihofa “o ccayay a so’linay Kawas” Cingra. (Yohani 17:3; Marko 12:29) Ci Yis o sakakaay wawa no Kawas, ilaeno’ay no Kawas cingra. (1 Korinto 11:3) O wama mikikakaay to wawa. (Yohani 14:28) Awaay ko tatirengan no fangcalay ’adingo’, nao ’icel no Kawas kora.—Satapangan 1:2; Dmak 2:18.

3. Kolismas ato Patikolay Ma’orip a Romi’ad: Cuwaka itini saka 12 folad 25 romi’ad a hofocen ci Yis. Ora kahofocan ningra romi’ad maedngay itini saka 10 folad saka ccay romi’ad; itini toniya folad, o pakaenay to siri a tamdaw nga’ayay ho misalafi’i mihimaw to siri i papotal. (Loka 2:8-12) Awaay ko sowal ni Yis to Krisciyang papi lawla tora kahofocan ningra romi’ad. Oiyaan kapatayan ningra koha kakiningen sanay to sikawdan. (Loka 22:19,20) Orira Kolismas ato rira milingatay tora romi’ad a kananaman lisin sahtoway o naitiniay i lalitengan a makaniway a pidoyongan. Oiya lisin nangra itiya toya patikolay ma’orip hananay a romi’ad sahtoway o naitiniay i makaniway a pidoyongan, ano patinakoen oiya kala sakadadmakan nangra fita’or atoya takoril itira toya romi’ad, mahcaday naitiraay i makaniway a pidoyongan. Oiya isa’ayaway a Krisciyang cuwaka pilawla to Kolismas atoya patikolay ma’orip a romi’ad, o aniniay a Krisciyang cuwaka pilawla to hatiniay a romi’ad.

4. Kahofocan Romi’ad: O masowalay no Fangcalay Cudad ’dengan tatosaay kora milawlaay to kahofocan romi’ad. Oniniya tatosa cuwako midokoay ci Yihofaan a tamdaw. (Satapangan 40:20-22; Marko 6:21,22,24-27) Oiya sa’ayaway Krisciyang cuwa kapi lawla to kahofocan romi’ad. Milawlaay to kahofocan romi’ad a kananaman lisin o naitiniay no lalitengan a makaniway a pidoyongan. O so’linay Krisciyang itiraay cangra i romaroma romi’ad a macacawma’ a malawla, pafli to sapakaolah a dafong.

Awaay ko lalangian ita toha sapita’ongaw to mapatayay tamdaw, hamaan matalaw cangraanan.

5. Matalaw to Mapatayay: O mapatayay tamdaw caayay pisamaamaan cangra, hanaca awaay ko kafana’an nangra. Awaay koha pakayraan ita padama cangraanan, cuwa koha mamidoka’ kitaanan. (’Olic 146:4; Patnakay 9:5,10) Mapatayay ko salo’afang, mapatay toko tamdaw cuwaka padadotoc matelek ko salo’afang. (Icikil 18:4) Kawraan, oiya mali’angay sikawdan ikakarayan (orira mali’angay ’adingo’) misaoyaoya ’adingo’ noya mapatayay tamdaw toha sapisafana’aw to tamdaw. Ora kananaman lisin ano milingatay tonika koki’ to mapatayay tamdaw anoca miligatay to mita’ongay to mapatayay tamdaw, oninian o mararaway kora.—Isaya 8:19.

6. Ciwcika: Cuwaka itini i ciwcika mapatay ci Yis, itiniay ccayay mo’celay tektek a mapatay cingra. Itini i adihayay a mihongyakan Fangcalay Cudad, sano Kilisiya a “ciwcika” a tilid o ccayay a tektek kora sanay. Ora ciwcika o naitiniay i lalitengan a makaniway a pidoyongan kora. Oiya isa’ayaway a Krisciyang cuwaka kala sakadadmak to ciwcika, cuwaka pidoko to hatiniay dafong cangra. Misahatilaay haw i, itini inoka pidoko ano kala sakadadmak to ciwcika o matatodongay han?—Limo’ot 7:26; 1 Korinto 10:14.

7. Mihawad to hatiniay a pihakelongan ato kananaman lisin tada pasangalay aratek. O sarawinawina ato widang iso aratek miro’roay kisowanan toha saka’caaw kapifalic iso to pihakelongan. Kawraan haratengn, mipakahmek to Kawas ikakaay hoko masakalimlaan tonika pakahmek to tamdaw.—Taneng 29:25; Matay 10:36,37.

Copyright © 2006 Watch Tower Bible and Tract Society of Pennsylvania. All rights reserved.