Pakaynien i Satolon a Mingata ko Kawas

1. O mitolonay dmak o lopai’ay a masasowal to Kawas kora. Oha mamalarid kiso a mitolon to Kawas. Ano mihaen i, oha mamahapinang iso to mingataay kiso to Kawas, hatilaay oya tadanga’ayay a widang iso. Ci Yihofa so’li’lin tada’akawangay tadamatomesay ko ’icel, kawra mahmekay Cingra mitngil to satolon ita! Kiso malariday mitolon to Kawas han?—’Olic 65:2; 1 Tisalonika 5:17.

2. O mitolonay onoka pidoko ita to Kawas a dmak kora. Misahatilaay haw i, o ’dengan ci Yihofa kora hatatolonen ita. Ya itiniho i hkal ci Yis cuwaka pitolon to cimacima tamdaw, o ’dengan o wama kora mitolonan ningra. Oha mamihaen to dmak kita cingraanan. (Matay 4:10; 6:9) Kawraan, ora satolon ita oha papakaynien i ngangan ni Yis a micangacang nga’. Mihaen to dmak kita mipa’ihkalay to misa’aretngay tora saaro’an ni Yis, halo pakaso’linay tora mipatafangan ningra sapatfoc.—Yohani 14:6; 1 Yohani 2:1,2.

3. Ano mitolon kita i, ora sowal ita to Kawas o naitiniay i kemod no faloco’ ita. Ora satolon ita cuwa koha nganga’ay mahaenay o mi’osiay to cudad. (Matay 6:7,8) Ano hacuwato ano icuwato, oha nganga’ay kita tano misa’aretngay a pakayraan mitolon to Kawas. Ano ’ca toka pahadak to ngiha kita mitolon i faloco’ matngilay no Kawas. (1 Samuil 1:12,13) Kilimen ko awaay ko daeses a pala mihadak tono tekedan a satolon tada nga’anga’ayay.—Marko 1:35.

4. Oha nganga’ay kiso mitolon to maanan a dmak hani? O kihcod milingatay hoto no kalalaed iso to Kawas a dmakan, oha nganga’ay kiso mihadak itini i satolon. (Filipi 4:6,7) Itini toya ta’adoan a satolon pa’ihkalay, oha mamicangacang kita pakayni i fangcalay ngangan ato harateng ni Yihofa. Oroma oha nganga’ay micangacang kita toha sapidipotaw no Kawas to pakadafongay a saeli ita, ato hasapisododaw to raraw ita, padama kitaanan micokel to sakayhid. (Matay 6:9-13) Ora mitolonan ita cuwa koha sakanga’ay aca ita; ora micangacangan ita cuwa koha mamisaflit to harateng no Kawas.—1 Yohani 5:14.

5. Ano iraay ko harateng iso toha sapiako’idaw anoca hasapahmekaw to Kawas i, nga’ayay mitolon kiso. (1 Rayray 29:10-13) Ano tahalifa to pasangal anoca sapalifet to pakaso’linay no faloco’ iso, nga’ayay kiso mitolon. (’Olic 55:22; 120:1) ’Ayaw hono kakomaen mitolon tada o matatodongay kora. (Matay 14:19) “Ano hacuwato ano icuwato” mitolon takowanan sanay ci Yihofa mitaaw kitaanan.—Ifiso 6:18.

6. Ano ira ko ’aretengay a raraw ita tada masakalimlaan itiya koha sapitolonaw ita. Itiya, nga’ayay kita micangacang to sasodod no Kawas a cisida’it kitaanan. ’Dengan ano so’linay kita pa’ihkal to raraw ita, halo misa’icel toha saka’caaw ka miliyaw a mararaw, oha “mamakahi misodod” ko Kawas kitaanan.—’Olic 86:5; Taneng 28:13.

7. O ’dengan o satolon no mo’celay tamdaw komi tngilan ni Yihofa. Oha mamisa’icel kiso mido’do to sarikec no Kawas a ma’orip, honga’ tngilen no Kawas ko satolon iso. (Taneng 15:29; 28:9) Mitolon i pairaen ko misapo^neray a faloco’. (Loka 18:9-14) Pairaen ko matatodongay anoka pisa’icel iso patoor tora micangacangan iso a dmak. Mihaen kiso to dmak o pa’ihkalay kiso tonoka pakaso’lin no faloco’ iso, halo pa’ihkalay kiso too naitiniay i faloco’ a saeli kora. ’Dengan aca ano mihaen kiso, honga’ mitngil ci Yihofa tora satolon iso.—Hipray 11:6.

Copyright © 2006 Watch Tower Bible and Tract Society of Pennsylvania. All rights reserved.