1. Me o wa kombeddi dong ikwano jami mapol mabeco ki i Baibul. Ngec man myero oteri me kwo i kit pa Lukricitayo. (Jo Epeco 4:22-24) Ngec ma kit meno pire tek me wek in inong kwo ma pe tum. (Jon 17:3) Ento, jo mukene bene mitte ni guwiny lok me kwena maber-ri wek gin bene kilargi. Lukricitayo me ada ducu myero gubed lucaden bot jo mukene. Man obedo cik pa Lubanga.—Jo Roma 10:10; 1 Jo Korint 9:16; 1 Temceo 4:16.
2. Iromo cako-ne ki nywako jami mabeco ma itye ka pwonnyone ki jo ma cok kwedi. Titgi bot jo me odi, luremi, lutino kwan luwoti, ki lutic luwoti. Par pirgi dok idii cwinyi ka iloko kwedgi. (2 Temceo 2:24, 25) Wii opo ni dano pol kare neno kit ngati mo-ni maloyo winnyo ngo ma en waco. Pi meno ber kiti romo ywayo jo mukene me winnyo kwena ma itito botgi.—Matayo 5:16; 1 Petero 3:1, 2, 16.
3. Motmot, ibitwero cako tito lok kacel ki kacokke pa Lucaden pa Jehovah ma cok kwedi. Man obedo gin acel ma pire tek i dongo-ni. (Matayo 24:14) Bibedo me yomcwiny madit mada ka nene itwero konnyo ngat mo mukene me doko latic pa Jehovah ki me nongo kwo ma pe tum!—1 Jo Tecalonika 2:19, 20. |
