Yecu Kricito En Anga?

1. Yecu okwo i polo macalo ngat mo me cwiny ma peya obino i lobo. En obedo cwec pa Lubanga me acel, pi meno gilwonge ni Wod me “kayo” pa Lubanga. (Jo Kolocai 1:15; Niyabo 3:14) Yecu kene aye Wod ma Lubanga ocweyo en kikome. Jehovah otiyo ki Yecu ma peya odoko dano macalo “ladiro tic” me cweyo jami mukene duc i polo ki i wi lobo. (Carolok 8:22-31; Jo Kolocai 1:16, 17) Lubanga otiyo kwede bene calo lalok madit pi En. Meno en aye omiyo gilwongo Yecu ni “Lok.”—Jon 1:1-3; Niyabo 19:13.

2. Lubanga ocwalo Wode i lobo kun nako kwone i i Maliam. Pi meno Yecu pe obedo tye ki wonne ma dano. Meno aye omiyo en pe olako bal nyo rac-mo. Lubanga ocwalo Yecu i lobo pi tyen lok adek: (1) Me pwonnyowa ada ma dok i kom Lubanga (Jon 18:37), (2) me gwoko genne-ne labongo balo bal, ma omiyowa labol me aluba (1 Petero 2:21), ki (3) me tyero kwo-ne wek ogonywa ki i bal ki to. Pingo meno mitte?—Matayo 20:28.

3. Pi kwero winnyo cik pa Lubanga, dano mukwongo, Adam, otimo gin ma Baibul lwongo ni “bal.” Pi meno Lubanga ongolo to i wiye. (Acakki 3:17-19) En onongo dong pe o i deyo pa Lubanga, pi meno odoko dong labal, ma dong pe leng. Motmot ocako tii ci oto. Adam okubo bal bot litinone ducu. Meno aye gin ma omiyo wan bene watii, two makowa, dok wato. Dano dong giromo larone nining?—Jo Roma 3:23; 5:12.

4. Yecu onongo obedo dano ma pe ki bal calo Adam. Ki tungcel, Yecu pe calo Adam, en obedo lawiny bot Lubanga i yo ducu kadi wa i atematema matek muloyo weng. Pi meno en aye romo tyero kwone ma pe ki bal me culo pi bal pa Adam. Meno aye gin ma Baibul lwongo ni “ginkok.” Litino pa Adam dong giromo gonnyogi ki i ngolo kop me to. Jo ducu ma giketo niye-gi i kom Yecu dong kiromo weko bal-gi ci ginongo kwo ma pe tum.—1 Temceo 2:5, 6; Jon 3:16; Jo Roma 5:18, 19.

Tic pa Yecu onongo tye iye pwony, timo tango, kadi wa tyero kwone pi wan

5. I kare ma en tye i lobo, Yecu ocango lutwo, opito jo ma kec nekogi, ki bene ojuko yamo magwar. En bene ocero jo muto. Pingo en otimo tango? (1) Kica omake i kom dano ma lupeko, dok omito ni ekonygi. (2) Tangone onyuto ni en obedo Wod pa Lubanga. (3) Gunyuto gin ma en bitimo pi dano ma luwiny i kare ma en biloyo wi lobo calo Rwot.—Matayo 14:14; Marako 2:10-12; Jon 5:28, 29.

6. Yecu oto ci Lubanga ocere calo gin acweya ma cwiny, ka dong odok i polo. (1 Petero 3:18) Cakke i kare meno Lubanga okete odoko Rwot. Cokcokki Yecu bityeko bal ki peko woko ducu ki i wi lobo-ni.—Jabuli 37:9-11; Carolok 2:21, 22.

Copyright © 2006 Watch Tower Bible and Tract Society of Pennsylvania. All rights reserved.